“Qanun qəbul edilməli və ona əsasən, uzağı 5 ildən sonra rayonlar tamamilə özləri-özlərini dolandırmalıdır”.

Bunu açıqlamasında ekspert Cümşüd Nuriyev deyib. Onun sözlərinə görə, mərkəzdən asılı olmadan özləri-özlərini dolandıra bilməsi üçün rayonların özünü təminat məsələsi gecikmədən həllini tapmalıdır:

C. Nuriyev bildirib ki, azad edilmiş əraziləri çıxmaq şərtilə digər rayonların, xüsusən də aran və dağətəyi bölgələrin özünü təmin etmək səviyyəsi yüksəkdir. “Amma məsələ ondadır ki, icra başçıları rayona investisiya cəlb etmək əvəzinə, yerli imkanlı şəxsləri şantaj etmək, sıxışdırmaqla məşğuldurlar. Bölgələrin özünü öz hesabına dolandıra bilməsi üçün rayon sistemi ümumiyyətlə, ləğv olunmalıdır.”

Ekspertin sözlərinə görə, elə rayon var ki, əhalisinin sayı 2-3 mindir. “Bu, kimə lazımdır? Rayonları iqtisadi rayonlar çərçivəsində birləşdirib, valilik sisteminə keçməliyik. Belədə, bələdiyyələr də özləri-özlərini təmin etmək məcburiyyətində qalacaqlarından, maliyyə mənbələri axtarmağa məcbur olacaqlar. Azərbaycan artıq 30 ildir müstəqildir. Bu müddət ərzində köhnə sistemdə qalmağımız başucalığı gətirmir”, deyə C. Nuriyev vurğulayıb. 

Bəli, məsələnin həlli üçün rayonların özünümaliyyələşdirməsi və yaxud yerli orqanların özünü maliyyələşdirilməsi haqqında qanuna da ehtiyac var. Lakin qanunda rayonların özlərini necə təmin etməli olduğu göstərilməyib. “Azərbaycanda rayonlarımız əkinçilik, heyvandarlıq və bitkiçilik üzrə bölünüb. Bir sözlə, rayonlar özünü maliyyələşməyə keçməlidir. Bu da tədricən həyata keçməlidir. İlk iki ildə özünü maliyyələşmə prosesi 50 faizi civarında əhatə olunmalıdır. 5 ildən sonra isə rayonlar tamamilə özləri-özlərini maliyyələşdirməlidir. Belə bir iqtisadi mexanizmin tətbiqilə son nəticədə rayonların özləri-özlərini dolandırmasına nail olmaq olar”.

Şahnaz Salehqızı, Paralel.az