Paralel.az xəbər verir ki, koronavirusa yoluxma hallarının qarşısının alınması məqsədilə polis ictimai nəqliyyatda kütləvi yoxlama-nəzarət tədbirləri keçirir. 

Daxili İşlər Nazirliyinin Mətbuat Xidmətindən verilən məlumata görə, xidməti formada və mülki geyimdə keçirilən tədbirlərdə tibbi maskadan istifadə etməyən, müəyyən olunan norma və qaydalara əməl etməyən şəxslər barəsində inzibati tənbeh tədbirləri tətbiq olunur, hərəkət iştirakçıları və sürücülərlə profilaktik söhbətlər aparılır. 

Polis əməkdaşları tərəfindən virus riskinin yüksək olduğu Bakı Metropoliteninin metrostansiyalarında, ictimai nəqliyyatda, taksilərdə, eləcə də digər qapalı məkanlarda sosial məsafənin gözlənilməsi, tənəffüs yollarını qoruyan fərdi vasitələrdən istifadənin vacibliyi, yaxud düzgün istifadənin zəruriliyi barədə vətəndaşlara tövsiyələr verilir. 

Nazirlər Kabinetinin qərarı ilə təsdiq edilmiş koronavirusun profilaktikasına dair metodiki göstərişlərə uyğun olaraq, paytaxt, eləcə də digər rayon və şəhərlərdə karantin rejimi qaydalarına əməl olunmasını təmin etmək məqsədilə daxili işlər orqanlarının əməkdaşları tərəfindən gücləndirilən nəzarət-profilaktik tədbirləri davam etdirilir.

P.S. Qeyd edə ki, 77 saylı marşrut xətti üzrə hərəkət edən avtobuslarda sərnişinlərin maskasız halda avtobusa daxil olmasını hər gün müşahidə etməkdəyik...

77 saylı marşrutlar hansısa səbəbdən kart sisteminə keçməyib. Daim insanların şikayət və qınağına baxmayaraq bu iş hələ də həllini tapmayıb.

Bu marşrut xətti üzrə hərəkət edən avtobusların sürücüləri idarəetmə zamanı qəza şəraiti yaradır, sərnişinlərin haqlı narazılığına səbəb müxtəlif kobud hərəkətlər edirlər. 

Şahnaz Salehqızı