Yaponiya adalarında yerləşən Kikay vulkanı eramızdan əvvəl 5279-cu ildə püskürüb. 

Paralel.az Qaynarinfo-ya istinadən xəbər verir ki, bunu "Dendrochronologia" jurnalında dərc olunan araşdırmanın nəticələri göstərir.

Bu nəticəyə son 10 000 ildə ən böyük vulkan püskürməsinin dəqiq tarixi ilə məşğul olan Ural alimləri gəliblər. Bunun üçün onlar Yamalda yarı qalıq ağacların böyümə halqalarını araşdırmalı olublar.

Rusiya Elmlər Akademiyasının Ural bölməsinin Eksperimental Tarix və Geologiya İnstitutunun dendroxronologiya laboratoriyalarının və UrFU-da humanitar tədqiqatlarda təbiət elmləri metodlarının aparıcı elmi işçisi Rəşit Xantemirov "RİA Novosti"yə müsahibəsində bildirib ki, Kikay vulkanının püskürməsinin mümkün tarixinə yaxın bir növ fəlakətli hadisə aşkar edilib. Onun sözlərinə görə, bu, ağacların böyüməsinin sürətlə azalmasına və anormal ağac halqalarının yaranmasına səbəb olub.

"Bu hadisə eramızdan əvvəl 5279-cu ildə baş verib və ağır şərtlər ən azı daha beş il davam edib", deyə alim məlumat verib.

Mütəxəssislər vurğulayırlar ki, belə bir kəşf digər vulkan püskürmələrinin xronologiyasını sinxronlaşdırmaq üçün vaxt göstəricisi ola bilər.