Qaradağ Rayon İcra Hakimiyyəti ilə Azərbaycan Dövlət Neft Şirkətinin (SOCAR) “Azneft” İstehsalat Birliyi arasında torpaq münasibətlərinə dair mübahisə yaranıb.

Qaynarinfo-ya daxil olan məlumata görə, mübahisə məhkəməyə qədər uzanıb. Məhkəmə çəkişməsində “Azneft” İstehsalat Birliyi iddiaçı qismində çıxış edir.

İş hazırda apellyasiya mərhələsindədir. Bildirilir ki, birinci instansiya məhkəməsi “Azneft”in iddiasını təmin etmədiyinə görə apellyasiya şikayəti verib. Şikayətə hakim Rəşid Səmədovun sədrliyi ilə baxılacaq.

Araşdırmalarımız zamanı məlum olub ki, mübahisənin kökündə SOCAR-ın balansında olan torpaq sahələrində yaşayış və qeyri-yaşayış tikililərinin olması ilə bağlıdır. Bu tikintilər isə Qaradağ Rayon İcra Hakimiyyətinin razılığı ilə aparılıb.

Oxşar problem Binəqədi və Bakının digər rayonlarında da var. İcra hakimiyyətləri Neft Şirkətinin balansında olan torpaq sahələrini ayrı-ayrı vətəndaşlara verib. Bununla da, SOCAR vətəndaşlarla üz-üzə qoyulub.

Neft şirkəti problemin həlli üçün məhkəmələrə üz tutub. Məhkəmələrdə belə işlər yüzlərlədir.

Qaradağ Rayon İcra Hakimiyyətinin başçısı Süleyman Mikayılovdur. O, 2010-cu ildən rayona rəhbərlik edir. Ümumiyyətlə isə Süleyman Mikayılovun icra başçısı kimi karyerası 2005-ci ildən başlayır. O, həmin ilin mayından dekabrına kimi Yardımlı rayonunun icra başçısı vəzifəsində çalışıb. 2005-ci ilin dekabrından 2010-cu ilin martına kimi isə Lənkərana rəhbərlik edib.

Süleyman Mikayılov barəsində ən çox şikayətlərin edildiyi icra başçıları kateqoriyasına daxildir. İslahatlar dalğasında onun da işdən çıxarılacağı gözlənilirdi.

Bəzi iddialara görə, Süleyman Mikayılov fövqəladə hallar naziri Kəmaləddin Heydərovun kadrıdır.