Macarıstan Ukraynaya 500 milyon avroluq hərbi yardımı əngəllədi

"Paralel.az" xəbər verir ki, Macarıstan hökuməti Ukraynaya Avropa Sülh Fondu çərçivəsində verilməsi planlaşdırılan növbəti hərbi dəstək tranşının ayrılmasını təsdiqləməyib, - bu barədə Reuters hökumətin mətbuat xidmətinə istinadən xəbər verir.

"Macarıstan Avropa İttifaqının digər üzvləri ilə birlikdə Avropa Sülh Fondundan müstəsna olaraq Ukraynaya yardım üçün istifadə etməsi ilə razılaşmır. Çünki bu, Aİ-nin digər sahələrdə maraqlarını təşviq etmək üçün kifayət qədər vəsaitin ayrılmasına imkan vermir", - mətbuat xidməti bildirib. .

Macarıstan hökuməti qeyd edib ki, qaldırılan məsələləri üzə çıxarmaq üçün Avropa Sülh Fondundan səkkizinci yardım tranşının ayrılmasını dayandırıb. Macarıstan nümayəndələri qeyd ediblər ki, fondun vəsaitlərindən Balkanlarda və Afrikanın şimalında istifadə etmək olar.

İtaliyanın ANSA agentliyi mənbələrə istinadən Macarıstanın Ukraynaya yardımın ayrılmasını əngəlləmək qərarı haqqında ilk məlumat yayıb. Onların sözlərinə görə, yardımın məbləği 500 milyon avro olub.

Avropa Sülh Fondu 2021-ci ilin martında yaradılıb. O, Avropa İttifaqına üzv ölkələrin töhfələri hesabına maliyyələşdirilir. Fond çərçivəsində Ukrayna Aİ-dən 3,6 milyard avroya yaxın vəsait alıb. Ukraynadan başqa, Avropa Sülh Fondu bir sıra ölkələrə, o cümlədən Gürcüstan, Moldova, Mali, Somali və Livana müdafiə yardımını maliyyələşdirib.

Avropa İttifaqının və NATO-nun üzvü olan Macarıstan Rusiyanın genişmiqyaslı işğalından sonra Ukraynaya hər hansı hərbi yardım göstərməkdən imtina edib, həmçinin bir sıra sanksiyaların tətbiqinə qarşı çıxıb. 2022-ci ildə Macarıstan Ukraynaya 18 milyard avroluq yardım proqramını blokladı. Bundan əlavə, mart ayında Macarıstan Aİ-nin Rusiya prezidenti Vladimir Putinin həbsinə dair beynəlxalq orderlə bağlı birgə bəyanatını bloklayıb.
Dəniz