Yasamal rayonunda tanışını qətlə yetirməkdə təqsirli bilinən Elçin Cavadovun cinayət işi üzrə təfərrüatlar məlum olub.

"Paralel.az" xəbər verir ki, Yasamal rayonunun Vasif Əliyev küçəsi 217 ünvanında, evdə tək yaşayan Bakı şəhər sakini, 41 yaşlı Mirzə Hüseynovun meyiti üzərində kəsilmiş-deşilmiş xəsarətlərlə aşkarlanıb. Məlum olub ki, bir neçə il əvvəl həbsdən azad olunan Mirzə Hüseynov həmin ünvanda tənha yaşayıb.

Polis və prokurorluq orqanları əməkdaşlarının əməliyyat-axtarış və istintaq tədbirləri nəticəsində cinayətin Bakı şəhər sakini, 1988-ci il təvəllüdlü Elçin Cavadov tərəfindən törədildiyi aşkarlanıb. O, narkotik istifadəçisi olub.

İş üzrə dindirilən Elçin Cavadov qeyd edib ki, Mirzə Hüseynovu narkotik vasitə və ya başqa əmlak ələ keçirmək məqsədi ilə öldürməyib. Mirzə ona qarşı ana söyüşü istifadə etdiyi üçün əsəbləşib və qısas niyyəti ilə cibindəki bıçaqla onu vurub.

Cavadovun sözlərinə görə Mirzə və qardaşı Xeyrullanı 2012-ci ildə bibisi oğlu Vüqarın vasitəsi ilə tanıyıb. Onlar narkotik maddələrin istifadəçisi olub. Dəfələrlə Hüseynov qardaşlarından marixuana və heroin alıb. Son zamanlar kakos adlandırılan narkotik vasitədən istifadə edib. Mİrzə bir bükümü ona 20 manata satıb. Aldığı narotikin miqdarı yalnız bir dəfə istifadə etmək üçün kifayət edib. 

Elçin bildirib ki, hadisədən bir neçə gün əvvəl Mirzə ilə telefonla danışarkən o, mayın 1-də anasının ad günü olacağını söyləyib və ondan yaxşı viski tapıb gətirməyi xahiş edib. Əvəzində ona narkotik maddə verəcəyini deyib. Həmin gün özünü pis hiss edib və narkotik qədul etməyə ehtiyacı olub. Şamaxinka deyilən əraziyə gedərkən Ceyhun adlı tanışı iələ rastlaşıb. Birlikdə mağazaya girərək oradan bir şüşə viski oğurlayaraq gödəkçəsində gizlədib. Mağazadan çıxdıqdan sonra piyada yaşadığı evin yanına gəlib. Mirzə ilə əlaqə saxlayıb spirtli içki aldığını söyləyib. Sonuncu isə onu evinə dəvət edib.  Onlara gələn zaman Mirzənin qonaq otağında divanda uzandığını görüb. Kresloda əyləşən Cavadov viskini uzadıb ona narkotik vasitə verməsini xahiş edib. Viskini alan Mirzə ona axşam gəlməsini bildirib. Lakin Elçin razılaşmayaraq özünü pis hiss etdiyini və gözləyə bilməyəcəyini deyib. Narkotik vasitə verməyəcəyi təqdirdə viskini qaytarmağı tələb edib. Bu zəmində aralarında mübahisə yaranıb. Mİrzə söyüş söydüyü üçün gödəkçəsinin cibindən bıçağı çıxararaq ovcunun içində sıxıb saxlayıb. Hər ikisi ayağa qalxıb və divanın qarşısında Hüseynovun ürək nahiyyəsinə ilk zərbəni endirib. Ardınca onun sol qoluna xəsarət yetirib. 

"Bıçağı çıxardıb açdım əlimdə saxladım. Üzbəüz söhbət eləyirdik. Dedim Mirzə o söyüşləri mənə söyürsən? Durdu ayağa məndə durdum ayağa. Üstümə gələn kimi bir dənə vurdum düz ürəyindən. Mən özümdə hiss elədim ki, girdi. Mirzə qəflətən qaçıb gödəkcəsini götürüb cibindən bıçaq axtarmağa başladı. Bir dənə də bıçaqla sol əlindən vurdum. Artıq sakitləşdi dedi mənə kömək elə qolumu yuyaq. Dedim Mirzə qolun elə belə şeydi əsas sinəndi. Açdım sinəsin gördüm deşilib.  Sonra yıxıldı". 

Elçin Cavadov ifadəsinin davamında bildirib ki, ev yiyəsinin gödəkcəsinin ciblərini axtarsa da narkotik maddə və ya pul tapmayıb. Mərhuma məxsus telefonu və viskini götürüb evi tərk edib. Bir müddət sonra pois əməkdaşları onu yaxalayıb.

Məhkəmə prosesində Elçin Cavadov ittiham üzrə özünü təqsirli bilib.

Bakı Ağır Cinayətlər Məhkəməsinin hökmü ilə o, 19 il müddətinə azadlıqdan məhrum edilib.

Natiq