Onunla heç vaxt görüşməmişik, şəxsi tanışlığımız yoxdur, amma onu barmaqlarından qopan səsdən yaxşı tanıyıram...

Do, re, mi, fa, sol, lya, si! İlk baxışdan adi görünən bu sıralama səsə çevriləndə ilahi möcüzə yaradır, insanın hislərinə hakim olur…

Bu möcüzəyə musiqi deyirlər- səsləndisə insan pərvazlanan ruhunu öz vücudunda saxlaya bilmir…

Yaxşı musiqi sərhəd tanımır- hansı irqə məxsus olmasından, hansı dildə düşünməsindən asılı olmayaraq insanı vəcdə gətirir…

Yeməkxanada əyləşib nahar etməyə hazırlaşırdım. Telefonumu əlimə götürüb, "YouTube"də Ənvər Sadıqovun "Təəssürat" adlı konsertinin videosunu seçdim. Düyməni basıb videonu hərəkətə gətirdim. Qulaqcıqdan istifadə etməyi xoşlamadığımdan ecazkar musiqi sədası altında qarşımda olan təamlardan dadmağa başladım. Yaxınlıqdakı masada 7-8 gənc amerikalı əyləşmişdi. Gənclər deyib gülə-gülə nahar edirdilər. Birdən həmin masaya qəribə bir sükut çökdü. Hiss etdim ki, onlar musiqiyə diqqət kəsiliblər. Bir qədər sonra gənclərdən biri mənə yaxınlaşıb xahiş etdi ki, telefonun səsini ucaldım. Səsin zəif olduğunu görüb, başqa birisi bel çantasından çox da böyük olmayan səsgücləndiricini çıxarıb, telefonu "Bluetooth" vasitəsi ilə ona qoşmağı xahiş etdi. Və musiqi sədaları yeməkxananın salonuna yayıldı. Hamı Ənvərin barmaqlarının yaratdığı səsin sehrinə düşmüşdü. Arada məndən soruşdular ki, bu hansı ölkənin musiqisidir, ifaçı kimdir? Birtəhər anlatdım ki, Azərbaycan adlı keçmiş sovet ölkələrindən birinin musiqisidir, ifaçı da Ənvər Sadıqovdur. Sən demə, həmin gənclər Miçiqan Dövlət Universitetinin musiqi fakultəsinin tələbələri imiş. 1 saat 45 dəqiqəlik konserti böyük həvəslə dinləyib, sonda hamısı, yəni yeməkxananın həmin hissəsində olan 20-30 adam ayağa qalxaraq, ölkəmizin adını yarıdüz, yarısəhv- "Long live Azerbaijan!"- deyə, alqışlamağa başladılar. Kaş o mənzərəni görəydiz, qürur hissi qəhərə dönüb necə boğazımda ilişib qalmışdı. Sevincdən gözlərim yaşarmışdı...

Unudulmaz qarmon ustası Aftandil İsrafilov əbədiyyətə qovuşsa da, nə yaxşı ki, onun musiqi yolunu davam etdirən belə sənətkarlarımız var, onlar öz vertiyoz ifaları ilə möcüzə yaradır, Azərbaycan musiqisinin nə qədər gözəl olduğunu dünyaya çatdıra bilirlər. Musiqisi gözəl olan xalqın mənəviyyatı da gözəldir.
Bəli, yaşasın, var olsun, Azərbaycan!..

Aprelin 30-u Ənvər Sadıqovun 57 yaşı tamam olur. Onu bu münasibətlə təbrik edir, möhkəm can sağlığı, firəvan həyat, yaradıcılıq uğurları arzulayıram…

Elman Eldaroğlu,
“Paralel.az"