Ermənistan silahlı qüvvələrinin 2-ci ordu korpusunun komandiri polkovnik Vahram Qriqoryan tutduğu vəzifədən uzaqlaşdırılacaq.

“Report” xəbər verir ki, bu barədə ölkənin İctimai Televiziyası məlumat yayıb.

Bildirilib ki, Ermənistan rəhbərliyi hərbi hissədə 15 hərbçinin ölümünə səbəb olan yanğına görə korpus komandirini günahkar bilir. Hadisənin baş verdiyi hərbi hissə 2-ci ordu korpusuna daxildir.

Müdafiə Nazirliyi polkovnikin işdən çıxarılacağı barədə məlumatı şərh etməyib.

Qeyd edək ki, ötən gecə Ermənistanın Basarkeçər rayonunun Azad kəndində N saylı hərbi hissənin mühəndis-istehkam bölüyünün kazarmasında yanğın baş verib. Hadisə nəticəsində 15 hərbçi həlak olub.

Xatırladaq ki, V. Qriqoryan 2021-ci ildə 2-ci ordu korpusunun komandiri təyin olunub.