Mətbuatdan bəlli olduğu kimi, 2022-ci ilin 20 yanvarında Saatlının Çolpı kəndində yerləşən mağazalardan birində yanğın olub. Mağaza içərisindəki əşyalarla birlikdə yanıb.
Paralel.az xəbər verir ki, obyektin sahibi Nabatkənd sakini Bilal Abdullayevdir. O, meydan tv-yə açıqlamasında 5 aydan çoxdur ki, mağazaya dəymiş zərərə görə sığortanı ala bilmədiyini deyir. Bilal Abdullayevin sözlərinə görə, hadisəyə səbəb elektrik naqillərindəki qısaqapanma olub. O, hadisədən sonra müvafiq sənədləri toplayaraq sığorta müqaviləsi olan “Azsığorta”ya üz tutub: “Məndən soruşdular ki, nə etmək fikrindəsən? Dedim ki, heç nə, sizinlə bağladığım müqaviləyə uyğun olaraq, sığortamı istəyirəm. Dedilər ki, onsuz da biz sənə məbləğin hamısını verməyəcəyik. Bir sözlə, şirkət sığortanı verməmək üçün min bir bəhanə uydurur”.
Bilal Abdullayev deyir ki, “Azsığorta” ona dəymiş zərərə görə cəmi 29 min 500 manat sığorta ödəməlidir, ancaq şirkət 4 min 900 manatdan çox ödəmək istəmir. Şikayətçi yarım ilə yaxındır ki, gah ekspertiza rəyinin ləngidilməsi, gah da sığorta şirkətinin pulu ödəməməsi üzündən fəaliyyətsiz qaldığını deyir: “Əvvəlcə aylarla Ekspertiza Mərkəzi rəyi ləngitdi. İndi də iki aydan çoxdur ki, sığorta şirkəti ödənişi ləngidir, daha doğrusu, dəymiş zərəri tam ödəmək istəmir. Başqa dolanışıq yerim yoxdur, ailəmi o mağazadan əldə etdiyim gəlirlə saxlayırdım. Gözümü o sığorta puluna dikmişəm ki, yanmış mağazanı təmir etdirib kiçik sahibkarlıq fəaliyyətimi bərpa edim. Şirkətsə əsəblərimi tarıma çəkib”.
Ədliyyə Nazirliyi Məhkəmə Ekspertizası Mərkəzinin 8 aprel 2022-ci il tarixli rəyində qeyd olunub ki, yanmış mağazanın təmiri üçün görülməli olan işlərin ümumi dəyəri hazırkı bazar qiymətlərinə uyğun olaraq 11.520 manatdır.
Ekspertiza Mərkəzinin 20 aprel 2022-ci il tarixli əmtəəşünaslıq ekspertizasının rəyində isə bildirilir ki, mağazadakı satışda olan geyimlərin əvvəlki orta bazar qiyməti ilə ümumi dəyəri nəzəri olaraq təxminən 28 min 212 manat müəyyən edilib.
“Azsığorta” ASC-dən isə bildirilib ki, Saatlı rayonu, Çolpı kəndində yerləşən və Bilal Abdullayevin sahibkarlıq fəaliyyətiylə məşğul olduğu mağaza “Azsığorta” ASC-də “Daşınmaz Əmlakın İcbari Sığortası” Şəhadətnaməsi ilə 1 illik sığortalanıb. Bu il də yanvarın 23-də ASC-yə mağazaya yanğın nətisəcində zərər dəyməsi barədə müraciət daxil olub.
Əmlaka dəymiş zərərin müəyyən edilməsi üçün hadisə yerinə sığorta sahəsində yardımçı fəaliyyət göstərən müstəqil ekspert cəlb olunub. Müstəqil ekspertin 4 fevral 2022-ci il tarixli rəyinə əsasən, daşınmaz əmlaka dəymiş zərər 5 min manat məbləğində müəyyən edilib. Bu məbləğdən 100 manat azadolma məbləği (sığorta hadisəsi nəticəsində yaranan itkilərin və ya dəyən zərərin sığorta təminatı ilə əhatə olunmayan və sığortalının üzərində qalan hissəsi deməkdir) çıxılaraq ASC tərəfindən 4900 manat sığorta ödənişi hesablanıb.
Amma Bilal Abdullayev bununla razılaşmır. O deyir ki, ötən ilin fevralında “Azsığorta” həm də mağazadakı malları 24 min manat məbləğində sığortalayıb: “İndi isə bəhanə gətirir ki, həmin malların hesab-fakturası təqdim olunmayıb ki, ona görə də sığorta ödənsin. Mən geyimləri “Sədərək” Ticarət Mərkəzindən alıb gətirirdim, “Sədərək”də indiyə kimi hansı mala görə hesab-faktura verilib ki? Əsasən yanan əşyalar geyimlər olub, onlar da dediyim kimi, “Sədərək”dən alınıb”.
Məsələyə münasibət bildirən hüquqşünas Namizəd Səfərov deyir ki, əgər sığorta şirkətiylə vətəndaş arasında fikir ayrılığı yaranıbsa, vətəndaş bunu məhkəmədə mübahisələndirə bilər: “Ekspertiza qurumunun şifahi məlumatlara əsaslanaraq və təxmini apardığı hesablamalar əsasında yazdığı rəyə əksər hallarda sığorta şirkətləri tərəfindən şübhəli yanaşılır. Belə olan halda, mağaza sahibi məhkəməyə müraciət edə bilər. O, məhkəməyə fotolar, videolar təqdim edə bilər”.

Bundan başqa, hüquqşünas bildirir ki, məhkəmə tərəfindən həmin mağazanın ətrafında yaşayan, oradan alış-veriş edən insanların mağazadakı alqı-satqı predmeti olan mallarla bağlı şahid izahatları da alına bilər:“Məhkəmədə sübuta yetirilsə, məhkəmə sığorta şirkətinin üzərinə məbləğin ödənilməsi öhdəliyi qoya bilər”.

Paralel.az