Bəlli olduğu kimi, Ali Qocayev haqqında mətbuatda məlumatlar səsləndirilir. Paralel.az aktualxeber.az-a istinadla aşağıdakı materialı təqdim edir.

Qocayev Alı İbrahim oğlu  2005-2012-ci illərdə Bakı şəhəri Binəqədi Rayon İcra Hakimiyyətinin başçısı vəzifələrində çalışıb. 18 aprel 2012-ci il tarixdən Samux Rayon İcra Hakimiyyətinin başçısı təyin edilib. Buradan samuxlulara “8 illik icra başçınızdan razısınızmı” sualını verərdik, amma bizi daş-qalaq edəcəklərindən qorxub, fikrimizdən vaz keçirik. 

Samux camaatı öz pulunu Alı Qocayevin dirnaqarası prokuror oğlunun xaricdə bizneslərində, mülklərində, bahalı maşın kolleksiyasında axtara bilər. Başçının oğlu Mehman Qocayevin prokurorluq orqanlarında karyerası ictimaiyyətdə böyük müzakirə predmetinə çevrilib. O, Türkiyədə və diqər ölkələrdə rəsmi bizneslə məşğuldur. Özü də ciddi, çoxmilyonluq bizneslə… Samux camaatının pulu bax, belə xərclənir…

Xalq Qocayevin əlindən niyə bu qədər qəzəblidir, axı? Demə, onun əlindən qəzəbli olan təkcə xalq deyil, həm də yuxarılar imiş. O, Binəqədidə icra başçısı olduğu müddətdə əlinə düşəni yeyib dağıdıb. Tamahı limit bilmirdi. Yeri gəlmişkən, o zaman SOCAR-ın prezidenti Rövnəq Abdullayev də Alı Qocayevi ARDNŞ-ə məxsus əraziləri vətəndaşlara satmaqda ittiham etmişdi. Araşdırmaçı jurnalist Cavanşir Həsənli onun Seyidlər kəndindəki üzüm emalı zavodunu özəlləşdirdiyini yazıb. Araşdırmalardan o da məlum olur ki, fəaliyyəti dövründə Alı Qocayev insanları ən çox narazı salan icra başçılarından olub. Onun rayonun Əhmədbəyli kənd sakini, 2 ildən yığılıb qalmış işıq pulunu ödəyə bilməyən və bunu görə elektrik xətti kəsilən veteran qızı Səlfinaz Bayramovaya “ödəyə bilmirsən, öl” deməsi uzun zaman mətbuatın gündəmindən düşmədi.

Amma bir məsələ var ki, Alı Qocayevin qudası, Milli Məclisin keçmiş sədri Oqtay Əsədov hələ də onu qoruya bilir. Deyəsən, yuxarılar bu “şıltaq qudanın” qanunsuz əməllərinə dözmək istəmir. Xalq da səbirsizliklə Alı Qocayevin digər həmkarları kimi qandallanıb aparılmasını həsrətlə gözləyir. Binəqədidə icra başçısı olarkən 20-25 min manat rüşvət alıb vətəndaşlara saxta sənədlərlə torpaq satan Alı Qocayevin həbsini onlar çoxdan arzulayır.

Misal üçün, Binəqədi rayon sakini Əsgərova Almaz İsa qızı “Aktualxeber.az”ın redaksiyasına şikayət edərək bildirib ki, Samux RİH başçısı Alı Qocayev vaxtilə Binəqədinin icra başçısı vəzifəsində çalışarkən ondan 20000 manat alaraq rayon ərazisindəki torpaq sahəsinin onun mülkiyyətinə keçirəcəyinə söz verib. Daha sonra A.Qocayev onlara həmin pulun müqabilində saxta sənədlər verərək cinayət törədib. Məsələnin üstü Almaz Əsgərovanın həmin ərazidə tikinti işi aparmasından sonra açılıb.

O da Binəqədi Rayon Polis İdarəsinin 7-ci Polis Bölməsinin əməkdaşlarının sayəsində. Yəni bu polis qardaşlarımız hər dəfə gəlib “şirinlik” istəməsəydilər, Almaz xanım da məcbur qalıb sənədləri yoxlatdırmasaydı, onların saxta olduğu bilinməyəcəkdi. O gündən bəri Alı Qocayev bu ailəni “pulu bu gün verəcəm, sabah verəcəm” metodu ilə aldadır. Üstündən 10 ildən çox keçməsinə baxmayaraq şikayətçi pulunu ala bilmir.

Amma Alı Qocayevin saxta sənəd qalmaqalı bununla bitmir…

Vaxtilə Binəqədi Rayon İcra Hakimiyyətinin başçısı olarkən qudası- Milli Məclisin keçmiş sədri Oqtay Əsədovun yüksək vəzifə tutması səbəbindən özünü “toxunulmaz” kimi hiss edən Alı müəllim demək olar ki, torpaqları saxta sənədlərlə satıb. Misal üçün, bir neçə il əvvəl “Yeni Müsavat” qəzetində dərc edilən materiallarda oxuyuruq:“Söhbət əsnasında aydın oldu ki, Binəqədi rayonunun icra başçısı Alı Qocayev neft ərazilərinin 80 faizə yaxınını satıb. İcra başçısının göstərişi ilə neft sahələrində bir sot torpaq sahəsi 1000 manata vətəndaşlara satılır. Buna görə vətəndaşlara heç bir rəsmi sənəd vermir. Vətəndaşı razı salmaq üçün icra nümayəndələri bələdiyyə sədrlərinə tapşırıq verib ki, onlar vətəndaşlara saxta sənədlər versin. Hətta bu sənədlərin saxta olduğu ARDNŞ əməkdaşlarının araşdırmaları zamanı üzə çıxıb. Belə görünməsin ki, başçı təkcə Rəsulzadə qəsəbəsində torpaq alveri ilə məşğuldur. Rayonun boş qalan bütün torpaqları satışa çıxarılıb. Bura 7-ci mikrorayon, Xarici Dairəvi küçəsi, Sulutəpə və Xocahəsən qəsəbələri də aiddir. Qəsəbənin II mədən 78-ci korpus ünvanında yaşayanlar isə sosial problemlərdən şikayətçidir. Deyirlər ki, kanalizasiya, su və qaz xətləri yerdən keçir. Ona görə də avtobus keçəndə kommunikasiya xətləri tez-tez partlayır. Kərim adlı sakin köhnə kanalizasiya xəttinin üfunət qoxusu yaydığını söyləyir: “Pəncərələri aça bilmirik. Bütün ölən heyvan cəsədləri və məişət tullantıları da ora atılır. Antisanitariya şəraitində yaşayırıq. Yay aylarında heç dayanmaq olmur”.
“Yeni Müsavat” qəzetində də dərc edilən digər məlumatda isə belə deyilir:
“A.Qocayev 7-ci mikrorayon ərazisində yeni inşa edilməkdə olan “Azadlıq” metrostansiyasının yaxınlığında yerləşən parkı hissələrə bölərək satır. Ərazidə yaşayan sakinlərin sözlərinə görə, metro tikintisindən istifadə edən icra başçısı bağdakı ağacları kökündən çıxartdırır. Buna etiraz edən sakinlər deyir ki, çıxarılmış ağacların hava limanına gedən yolun kənarlarına əkildiyi bildirilir: “Bizə deyirlər ki, bağdan çıxarılan ağaclar prezident İlham Əliyevin hər gün keçdiyi hava limanına gedən yolun kənarlarına əkilir. 20-dən artıq yaşı olan iri palıd ağaclarının harasa aparılıb əkilməsi mümkün deyil axı. Sadəcə olaraq, Alı Qocayev prezidentin adından istifadə edir”.

Samuxun icra başçısı Alı Qocayev daha bir qalmaqallı addımı ilə son günlər diqqəti üstünə çəkib. Belə ki, Qocayev hansısa şəxsi marağına görə, ali təhsili olmayan Gəncə şəhər sakini Məmmədbəyova Şəms Elburus qızını Əhmədbəyli kəndindəki körpələr evi-uşaq bağçasına müdirə təyin edib. Ancaq Alı Ocayevin bu təyinatı Əhmədbəyli kənd sakinləri arasında birmənalı qarşılanmayıb. Hələ bu azmış kimi, icra başçısı sanki kənd sakinlərinin acığına Şəms xanımın anası Səadət Məmmədbəyovanı da Sərkar kənd musiqi məktəbinə direktor təyin edib. Alı Qocayevin bu ailəyə olan gözlənilməz (bəlkə də gözlənilən) diqqət və qayğısı bununla da yekunlaşmayıb. Samuxun bakılı “xan”ı Qocayev 2 ildir ki, Əhmədbəyli kəndində müdirəlik edən Şəms xanımı DİM-in imtahanından kənar şəkildə birdən-birə Gəncə Dövlət Universitetinə qəbul etdirib.
Mənbə onu da iddia edir ki, Şəms Məmmədbəyova guya 2011-ci ildə Gəncə Musiqi Texnikumunu bitirib. Çünki o, BB-118511 saylı saxta diplomu qanunsuz yolla əldə edib. Ən maraqlı və diqqətçəkən məqamlardan biri də ondan ibarətdir ki,qısa zaman kəsiyində Şəms Məmmədbəyova körpələr evi-uşaq bağçasından aldığı maaşı qəpik-qəpik toplayaraq qiyməti 100.000 manat civarında olan “Nissan”(“Cip” tipli) avtomobili də ala bilib.
“20- EF- 533” dövlət nömrə nişanlı maşını nə Samux polisi, nə də ki, ətraf rayonların Yol Paturul Xidmətinin əməkdaşları saxlaya bilir. Hətta 44 günlük müharibə zamanı Gəncəyə raket düşəndə evləri yararsız hala düşən Ş.Məmmədbəyova birdən-birə Gülüstan qəsəbəsində, məhz icra başçısı Alı Qocayevin qonşuluğunda qiyməti yüz minlərlə ölçülən vilaya da sahiblənib. Bu xanımın qısa zaman kəsiyində geniş maliyyə imkanlarına sahiblənməsi və əldə etdiyi “uğurlar” istər-istəməz ciddi suallar doğurur. Əhmədbəyli sakinləri deyir ki,bəlkə Alı Qocayev bu haqda bir açıqlama versin, biz də sakitcə oturaq yerimizdə.

Samuxdaki mənbəmiz onu da deyir ki, Şəms Məmmədbəyova ürəyi istədiyi vaxt Alı Qocayevin qəbuluna düşə bilir. Lap orada yüzlərlə adam gözləsə belə… 

Görəsən, Şəms xanım bu təhsillə, bu yaşam tərzi ilə Əhmədbəyli kəndindəki körpələr üçün rəhbərlik etdiyi uşaq bağçasında elementar təlim-tərbiyə təşkil edə bilirmi? Daha bir ilginc iddia: Samuxdakı mənbə deyir ki, Şəms Məmmədbəyovanın anası Sərkar kənd musiqi məktəbinin direktoru Səadət Məmmədbəyova da saxta diplomla işləyir.O, 2007-ci ildə Gəncə şəhərində yerləşən Müəllimlər İnstitutundan AKQ 087826 saylı saxta diplom əldə edib. Səadət Məmmədbəyova həmin sənəddən istifadə edərək, adları məktəbdə gedən, amma faktiki olaraq işləməyən şəxslərin adına əmək haqqı yazır, uşaqların sayını artırmaqla əlavə sinif açır. Bununla da külli miqdarda dövlət vəsaitini mənimsəyir. Bu addım isə Azərbaycan Respublikası CM-nin 308-ci, (vəzifədən sui-istifadə), 320-ci (saxta sənəd əldə etmə və saxta sənəddən istifadə etmə),313-cü (vəzifə saxtakarlığı) və 179-cu (dövlət əmlakını mənimsəmə) maddələrinin tələblərini pozmaqla cinayət əməllərini törətməsinə dəlalət edir. Məlumata üçün onu da bildirək ki,Məmmədbəyova Şəmsin saxta sənəd əldə etməsi və həmin sənəddən istifadə edərək rəhbər işləməsi də Azərbaycan Respublikası CM-nin 320-ci maddəsi ilə cinayət tərkibi yaradır. Eyni zamanda, bu addım Korrupsiyaya qarşı Mübarizə haqqında Qanunun tələblərinə də ziddir.

Paralel.az