İsmayıllı şəhəri İsrayıl Həsənov adına 1 saylı tam orta məktəbin ibtidai sinif müəlliməsi Məmmədova Jalə Nadir qızı işlədiyi məktəbdə məktəb direktoru, müavinləri və s. ona qarşı apardığı iyrənc kampaniya barəsində ölkə rəhbərliyinə müraciət edərək kömək istəyir. Paralel.az azinfo-ya istinadla bu barədə xəbər verir: “Diqqətinizə çatdırmaq istəyirəm ki, haqqımda aparılan birinci araşdırmanın nəticəsini rədd edirəm və bildirirəm ki, bu fikirlər tamamilə şər-böhtan və qərəzlidir.Eyni zamanda, araşdırma obyektiv aparılmayıb və şəxsən siz müdir Rövşən Əliyevin sifarişi əsasında mənə qarşı əsassız və sübutsuz halda boş fikir və söz yığını ilə tərtib olunub.
Əgər belə deyilsə, onda sübutlarınızı ortaya qoyun.
Araşdırma zamanı üzləşdirmə,dəyirmi masa və s. keçirilmədi, hansı ki, bütün bunlar üçün siz söz vermişdiniz. Sonda özünüz söylədiniz ki, bu araşdırma qeyri-peşəkar şəkildə aparılıb. Elə isə niyə nəticəni ləğv etmədiniz?
Rövşən müəllim!
Niyə mən cənab başçıya müraciət edəndən sonra nəticələri ləğv etdiniz?
Çünki başçı sizdən haqqımda yazılan fikirləri sübutedəsi dəlillər istədi, həkimin möhürlü rəyini tələb etdi. Siz niyə belə qanunsuz işlərə gedirsiniz?
Nəyə görə mənə dediniz ki, hara istəyirsən şikayət et. Düşündünüz ki, mən cənab nazirə, cənab başçıya müraciət etsəm belə, siz məni onlara mənfi obraz kimi təqdim edəcək və onlarda mənim haqqımda mənfi fikirlər yarada biləcəksiniz. Ancaq alınmadı, çünki onlar daha ədalətli davrandılar. Siz təqdim etdiyiniz hər bir fikrə görə məsuliyyət daşıyırsınız və lazım olduqda cavab verməli olacaqsınız.
Məktəbin rəhbərliyi mənim cənab nazirin onlayn qəbulunda olacağımı bilirdilər və buna görə tələsik sizin tövsiyəniz əsasında "müəllim etikası" adında bir saxta komissiya yaratdılar. Mən bu tədris müəssisəsində 22 ildir ki, işləyirəm, belə bir komissiyanın olmasına rast gəlməmişəm və məndən əvvəl işləyən müəllimlərdən xəbər almışam, onlar da belə bir komissiya haqqında məlumatlarının olmaması barədə məni bilgiləndirib.
Niyə bu komissiya mən Təhsil Nazirliyinə və İcra Hakimiyyətinə müraciət edərkən yaradılır?
Hazırda da mən İcra Hakimiyyətinə müraciət etdiyim üçün həmin komissiya fəaliyyət göstərir, əlbəttə, mənə qarşı. Komissiyanın sədri Dilbər müəllimə 13 Aprel 2022-ci il tarixində məni çağırıb dedi ki, heyət sizi məktəbə buraxmayacaq. Sual edirəm, bu səlahiyyəti onlara kim verib? Rövşən müəllim, onlara bu səlahiyyəti siz vermisiniz, çünki onlar sizin adınızı çəkir və sizə güvəndiklərini hər yerdə deyirlər. Məgər mən hansı bir pis əməl sahibiyəm ki, məktəbə buraxılmıram? Yaxud dövlət qurumlarına müraciət etmək nə vaxtdan bəri pis əməl sayılır? Mən burda ədalət tapa bilmirəmsə, onda dövlətin digər qurumlarına müraciət etmək hüququna malikəm, bu mənim konstitusion hüququmdur.
Başıma gələn işlərdən həm Dilbər müəllimənin, həm də Nurlan müəllimin xəbəri var, sadəcə, onlar üzdə bir söz, gizlində isə başqa söz danışırlar. Dəfələrlə onlar mənim haqlı olduğumu bildiriblər, ancaq sonradan rəhbərliyin təpkisi nəticəsində sözlərini danıblar.
Dilbər müəllimənin 65 yaşı tamam olub və müqavilə əsasında işləyir. Buna nə ehtiyac var? Məgər gənc kadrlar yoxmudur bu müəssisədə?
Mən direktor və dərs hissə müdiri barəsində şikayət etmişəm və peşman deyiləm. Məni valideyn onların sifarişi əsasında şagirdlərin gözü qarşısında təhqir edəndə heç bir mühafizə təşkil olunmadı. Niyə onda həmin komissiya yaradılmadı? Deməli, yalnız rəhbərlikdən şikayət olunan zaman lazım olur komissiya? Bəs sıravi müəllimlərin hüquqlarını kim müdafiə edəcək? Bu nə anormallıq, bu nə özbaşınalıqdır? Kim gətirdi bu dəyərsizlikləri İsmayıllı təhsilinə?

Təhsil şöbəsinin göstərişi əsasında Gülşən müəllimə mənə qarşı saxta araşdırma aparan zaman, niyə siz müdir olaraq buna etiraz etmədiniz? İndi hansı dürüstlükdən dəm vurursunuz?
Hətta həmkarlarımı mənə qarşı səfərbər edərək əleyhimə izahatlar yazdırılıb. Güllübəyim, Qudsiyyə, Yekaterina və s. müəllimlərə əleyhimə izahat yazdırılır və bunlardan şəxsən sizin xəbəriniz var. Əgər dərs hissə müdiri mənə qarşı qərəzlidirsə, əlbəttə, əleyhimə istənilən oyunu qura, izahatı yazdıra bilərdi. Bəs sizin ədalətli mövqeyiniz harda qaldı? Dəfələrlə təhqir olunmağım və s. üçün zamanı çatanda məhkəmə qarşısında fikir bildirəcək və siz də başda olmaqla hamı cavab verməli olacaq.
Çox qəribədir, həmkar rəhbərliyin, yoxsa müəllimin hüququnu qorumalıdır? Bu nə oyunbazlıqdır ki, həmkar çoxbaşlı oyun oynayır? Deyir ki, mənə oxumadığım sənədə imza atdırdılar. 33 ilin müəlliminin danışığına fikir verin.
Dövlət qurumlarına şəhid ailələri, qazilər, bir sözlə, bütün ölkə vətəndaşları müraciət edərək problemlərinin həlli istiqamətində tədbir görmələrini istəyirlər. Burada nə problem var? Ancaq nədənsə mən müraciət edəndə aləm dəydi bir-birinə. Çünki sizlər qanunsuz işlərlə məşğul olursunuz və istəmirsiniz ki, bütün bunların üstü açılsın.
Rus bölməsinin müəlliməsi Yekaterina ilə də aramızda olanları məhkəmə predmeti olduğu üçün məhkəməyə saxlayıram. Çünki burada da mübhəm suallar və əməllər var.
Bütün bunları Ramiz müəllimin yanında Dilbər müəllimənin iştirakı ilə müzakirə etmişik və Dilbər müəllimə olanları səmimi şəkildə etiraf edib. Ancaq sonradan fikrini danıb. Ümumiyyətlə, bu məktəbi şəxsi obyektinə çevirən şəxslər var. Rəhbərliyin yaxın qohumları bu məktəbdə müxtəlif işlərdə işləyir və buna görə hamının dili bir-birinin yanında qısadır.
Bəli, Qudsiyyə, Yekaterina müəllimə və s. əleyhimə izahatları təzyiq altında yazıblar və sizin bundan xəbəriniz var.
Dərs hissə müdirinin əmisi nəvəsi mühafizədə, qeydiyyat şöbəsində, lobarant, gəlini və s. qohumlarını bu məktəbə yerləşdirib və məktəbi şəxsi təsərrüfatı kimi idarə edir.
Araşdırma aparılsa, ortaya çıxar ki, bu qohum-əqrəba şəbəkəsi məktəbdə hansı oyunlara rəhbərlik edir və hansı qanunsuz əməlləri həyata keçirir”.
Qarşı tərəf də öz mövqeyini söyləyə bilər.
Paralel.az