Paralel.az xəbər verir ki, araşdırmaçı jurnalist Xristo Qrozev prezident Vladimir Putin və müdafiə naziri Sergey Şoyquya diqqət çəkən iddia ilə çıxış edib.
X.Qrozevin sözlərinə görə, Kremlin yüksək rütbəli rəsmilərinin istifadə etdiyi təyyarələrin hərəkəti Putinin Qərbi Sibirdə Surqut yaxınlığındakı bunkerdə ola biləcəyini göstərir.
Həftələrlə müəmmalı şəkildə yoxa çıxan və ekranda görünməsinə baxmayaraq səhhəti ilə bağlı söz-söhbətlər davam edən müdafiə naziri Sergey Şoyqunun da Moskvadan 1600 km aralıda Ufada bunkerdə olduğu güman edilir.
Şoyqunun 31 yaşlı qızı Kseniyanın Ufada bir neçə dəfə görüntülənməsi rusiyalı nazirə qarşı iddiaları gücləndirib.
İngilis araşdırma təşkilatı “Bellingcat”da çalışan jurnalist Qrozev 66 yaşlı rusiyalı nazirin nüvə müharibəsi qorxusundan sığınacağa getdiyini, Şoyqunun Uralın cənubundakı sığınacaqda qaldığını iddia edib: “Mən tam əminəm ki, Şoyqu bunkerdədir. Təyyarəsinin hərəkətindən sonra biz onun Ufaya çox tez-tez uçduğunu görürük. Bu ərazidə möhkəm mühafizə olunan bunkerlərin olduğunu bilmək bizə onun yaşayış yeri ilə bağlı dəqiq cavab verir”.
Qrozev Putinin də başqa bunkerdə olduğunu ifadə edərək deyib: “Putin yəqin ki, başqa yerdədir, çünki biz Ufaya gedənlərdən daha çox gizli uçuşlar görürük. Bunlar dövlət təyyarələridir və Surqut ətrafında transponderlərini söndürürlər. Son mərhələ olduqca gizli görünür. Çox güman ki, orada hökumətin elitasının qaldığı başqa bir ziyarətgah var”.
Müharibənin ilk günlərində Putinin yaxın qohumlarını Altay dağlarında gizli sığınacağa aparması ilə bağlı iddialar geniş müzakirə olunub, lakin sübuta yetirilməyib.
Yüksək mühafizə olunan nüvə bunkerlərinə işarə edən yüksək səviyyəli şəxslərin təyyarə hərəkətləri Putinin nüvə silahı yerləşdirməyə hazır ola biləcəyi ilə bağlı narahatlıqları yenidən alovlandırıb.

Nigar

Paralel.az