Azərbaycan Premyer Liqasının 2023/24 mövsümündə iştirak edən futbolçulardan 10-u ölkə çempionatında 250 və daha çox oyun keçirib.

Peşəkar Futbol Liqasının Mətbuat Xidməti xəbər verir ki, turnirin ən təcrübəli üç oyunçusu öz komandasının kapitanıdır.

“Qəbələ”nin üzvü Asif Məmmədov karyerasını Premyer Liqada davam etdirənlər arasında hamıdan öndədir. O, “Qarabağ”lı Maksim Medvedevi səkkiz, “Kəpəz”in üzvü Vurğun Hüseynovu doqquz matç qabaqlayır.

Bu üç kapitandan başqa, daha iki futbolçu 300-ü keçib. Digər beş oyunçu isə 250-dən artıq görüşün iştirakçısıdır.

Onluqda “Qəbələ”nin üç futbolçusu var. “Qarabağ”la “Neftçi” iki üzvünün təcrübəsi ilə öyünə bilər. “Kəpəz”, “Turan Tovuz” və “Zirə”də bir belə oyunçu var. Lakin qəsəbə klubunun qapıçısı digər doqquz futbolçudan fərqli olaraq bu mövsüm meydana çıxmayıb.