Qarabağ qazisi Siruz İsmayılov Əmək və Əhalinin Sosial Müdafiəsi Nazirliyini məhkəməyə verib.

Qaynarinfo xəbər verir ki, Qarabağ qazisinin iddiasına Gəncə İnzibati Məhkəməsində baxılacaq. İş hakim Fikrət Hüseynovun icraatındadır.
Məhkəmə çəkişməsinin səbəbi inzibati orqanların aktları və hərəkətləri (hərəkətsizliyi) ilə əlaqədar mübahisələrdən ibarətdir.

Siruz İsmayılov 44 günlük Qarabağ savaşında Talış kəndi və Suqovuşan uğrunda gedən döyüşlərdə iştirak edib. Suqovuşanda qızğın döyüşlər nəticəsində bir qolunu itirib. O, “Ağdamın azad olunmasına görə” və “Cəsur döyüşçü” medalları ilə təltif edilib.

Ehtimal olunur ki, Qarabağ qazisinin nazirliyi məhkəməyə verməsi sosial təminat məsələləri ilə bağlıdır.

Əmək və əhalinin sosial müdafiəsi naziri Sahil Babayevdir. O, 2018-ci ilin aprelindən bu vəzifədədir.

Sahil Babayev nazir təyin olunandan millətin əlil və sosial müdafiəyə ehtiyacı olan kəsimini ehtiyac içində boğduğuna görə, ictimaiyyət tərəfindən ciddi tənqid edilir.

Xüsusilə, qazilərin sosial problemləri ilə bağlı məsələlərdə nazirin fəaliyyətinə münasibət mənfidir.