Ər-Riyadda Səudiyyə Ərəbistanı və Türkiyə xarici işlər nazirlikləri arasında uzun illər ərzində siyasi məsləhətləşmələrin ilk raundu keçirilib.

Bu barədə Səudiyyə Ərəbistanının “SPA” xəbər agentliyi məlumat yayıb.

Türkiyənin Səudiyyə Ərəbistanı, Yəmən və Küveytlə siyasi məsləhətləşmələr aparacağı bildirilib. Türkiyə xarici işlər nazirinin müavini Burak Akçapar Krallığın xarici işlər nazirinin müavini Valid Əl-Hereycinin dəvəti ilə aprelin 10-da Ər-Riyada səfər edib.

Qeyd olunub ki, tərəflər müxtəlif sahələrdə əməkdaşlığın genişləndirilməsi yollarını müzakirə edərək iki ölkə hökumətləri arasında siyasi məsləhətləşmələrin birinci raundunu keçiriblər:

“Onlar həmçinin səylərin artırılması və ikitərəfli koordinasiya məsələlərini müzakirə ediblər. Mövcud beynəlxalq vəziyyət, regional və beynəlxalq arenada əsas çağırışlar və böhranlar müzakirə edilib. Həmçinin görüş zamanı müxtəlif sahələrdə birgə əməkdaşlığın genişləndirilməsi yolları müzakirə edilib”- məlumatda vurğulanıb.