Azərbaycanda "5-ci kolon" xalqın narazılığını gücləndirir
Məmurlar sosial-iqtisadi durumu qəsdən ağırlaşdırırlar
Ölkə prezidenti işğaldan azad olunmuş torpaqlarda dirçəlişi təmin etmək və Azərbaycan xalqının rifahını yaxşılaşdırmaq üçün hazırda çox ciddi çalışır. Eyni zamanda həm xarici düşmənlərlə mübariz aparır, həm də ölkə daxilində bahalaşma yaradan və özbaşınalıqlarla xalqa zülm edən məmurlara qarşı ciddi ölçü götürməyə səy göstərir.
Hazırda xalqı narahat edən əsas problem əmək haqqı və təqaüdlərin miqdarının azlığı, bu fonda hər gün bazar və marketlərdə sürətlə artan qiymətlərdir. Xalqa görə, Azərbaycanda bahalıq yaradan dövlət orqanları arasında ilk yeri Dövlət Gömrük Komitəsi (DGK) tutur. Bu komitənin Azərbaycana xaricdən mal gətirən biznesmen və sahibkarlara vurduğu zərbə sonunda eyni təsirlə xalqın başına dəyir.
Ölkə prezidentinin tapşırığı ilə DTX Gömrük Komitəsində vaxtaşırı əməliyyat aparır və hər dəfə bir neçə general saxlanılır. Amma DGK rəhbəri Səfər Mehdiyev başına topladığı qohum-əqraba və həmkəndliləri ilə çirkin əməlini davam etdirir. "Krışasız" sahibkarları talayır, yüksək vəzifəli himayədarları olan sahibkarların malının gömrükdən kənar keçməsinə şərait yaradır. Məsələn, ölkəyə xaricdən gətirilən dərman preparatlarının və digər malların yüksək rütbəli məmurlar himayəsilə qaçaqmalçılıqla ölkəyə gətirilməsindən hamının xəbər var.
Ölkə əhalisi arasında ən çox narazılıq yaradan dövlət orqanlarından biri də ƏƏSMN-dir. Bu nazirlik sözün tam mənasında təqaüd, pensiya və dövlət yardımı alan insanlara zülm edir. Ölkədə sıravi fəhlədən tutmuş deputatlara qədər hər kəsin tənqid hədəfinə çevrilmiş ƏƏSMN-in həyata keçirdiyi yarıtmaz sosial siyasət hər kəsi qəzəbləndirsə də, bu, baş nazirə və iqtisadiyyat nazirinə zərrəcə təsir etmir.
DGK və ƏƏSMN-in uğursuz fəaliyyəti nəticəsində ölkədə yaranmış bahalıq və sosial narazılıq Azərbaycanı hazırda partlamaq ərəfəsində olan qaz balonuna bənzədir. Hər yerdə etiraz, hər tərəfdə narazılıq səsləri eşidilir. Lakin xalqın əksəriyyətinin etirazına səbəb olan məmur özbaşınalığına əncam çəkməli olan hökumət susur və acizlik göstərir.
Şəhid ailələrinə, müharibə əlillərinə və qazilərə qarşı rüşvətxor, oğlunu müharibədən gizlədən məmurların ədalətsiz hərəkətləri xalqı daha çox qəzəbləndirir.
Ölkədə baş vermiş son narazılıqdan doğan hadisələr də təsdiq edir ki, xidmət sahədə çalışan yüksək rütbəli məmurlar "5-ci kolonun" tapşırığı ilə ölkə prezidentinin xalqa yüksək xidmət göstərmək üçün imzaladığı Fərman və Sərəncamları, verdiyi tapşırıqları normal yerinə yetirmirlər. Əksinə, həmin sənədlərdən irəli gələn xalqa xidmət haqqında tələblərə əməl etmək əvəzinə, prezidentə yalan məlumatlar verməklə faktiki onun sosial siyasətini sobataj edirlər.
Ermənistanın və digər düşmən dövlətlərin Azərbaycandakı uzantıları son zaman çox fəallaşıblar. Ölkədə dövlət çevrilişi etməyə çalışan qüvvələrin mövcudluğu barədə mediada və sosial şəbəkələrdə mütəmadi yayılan materiallar, məhz düşmən qüvvələrin fəaliyyətindən xəbər verir.
Dünyada baş verən böhranların Azərbaycanda daha da güclənməsinə çalışan daxili və xarici düşmələrin xalqımıza və dövlətimizə qarşı törətdikləri çirkin hərəkətlərin qarşısını almaq üçün öncə xalqa qarşı hər cür yaramazlıqlarla məşğul olan daxili düşmənləri- "5-ci kolon" üzvlərini zərərsizləşdirmək ən ümdə vəzifədir.