Bill Qeytsin "peyğəmbərliyi"
COVİD-19 olmasın, onun ştammı olsun...
Nəhayət ki, koronavirus pandemiyası deyilən bəladan bir qədər uzaqlaşdıq, qurtulduq ona görə demirəm, çünki düşər-düşməzi olar, həm də axı bütün qadağalara və məhdudiyyətlərə hələ tam son qoyulmayıb. Hələ də bu virusun mövcudluğuna inanan, daha doğrusu inanmaq istəyən bir çox insanlar və dövlətlər var cahanda. Onları inandırmağa çalışanlar isə daha çoxdur. Məsələn, koronavirus pandemiyasının fəsadları barədə dünyaya car çəkən amerikalı milyarder,"Microsoft" şirkətinin yaradıcısı Bill Qeyts yenə də "peyğəmbər"sayağı öncəgörməsi ilə meyadana çıxıb.
Yadınızdadırsa, hələ o zamanlar bir çox dünyagörmüş-səhiyyədən, biznesdən və heç şübhəsiz ki, dünya siyasətindən xiridar olan insanlar bəyan etmişdilər ki, COVİD-19 virusu bundan əvvəl mövcud olmuş bir çox viruslardan heç də qorxulu deyil. Bu dəhşətli pandemiya haqqındakı mifi isə səhiyyə və biznes mafiyası dövriyyəyə buraxıb ki, öz sərvətlərini və dünya düzəninə təsir imkanlarını artıra bilsinlər. Təəssüflər olsun ki, onlar siyasi gündəmi də öz əməliyyatlarına alət edə bildilər.
Açığını deyim ki, mən də reallıq kimi ortaya atılan pandemiya faciəsi haqqındakı miflərdən daha çox həmin insanların açıqlamalarına inanırdım.
İndi, dünyada koronavirus pandemiyasının son akkordları çalınan zaman Bill Qeytsin yenidən zühür etməsi və COVİD-19 virusundan daha qorxulu və təhlükəli bir virusun gələcəyi barədə "peyğəmbərlik" etməsi də, istər-istəməz belə düşünməyə əsas verir ki, bir çox dünya dövlətlərinin böyük iqtisadi itkilərinə, insanların isə sosial və psixoloji sarsıntılırına səbəb olan bu pandemiya, heç şübhəsiz ki, Bill Qeyts kimi milyarderlərin daha da varlanması, yəni səhiyyə və biznes mafiyasının qələbəsi ilə nəticələndi. Sona çatdı demirəm, çünki onun bu açıqlaması, oyunun hələ də davam etdiyini, və ya davam edə biləcəyini deməyə əsas verir.
Bill Qeytsin dediklərinə diqqət edin: "COVİD-19 virusunun daha yolxucu və ölümcül variantı ilə qarşılaşmaq riskimiz hələ də var. Mən bədbin proqnozlar vermək istəmirəm, amma koronavirus pandemiyası zamanı onun ən pis təzahurünü görmədik". Bu açıqlamanın özü də insanlarda müəyyən şübhələr yaradır. Çünki dünya tibb uzmanları iddia edir ki, pandemiya bitdi və insanların normal həyata qayıtmaq vaxtıdır. Bu zaman pandemiya carçısı yenidən zühür edir və bildirir ki, "pandemiya zamanı hələ onun ən pis təzahurünü görmədik". Demək ki, bu virus heç də təbii deyil və kimlərsə, onun daha ağır təzaşhürlərini əvvəlcədən proqnozlaşdırıblar. Xatırlayırsınızsa, pandemiyanın ilk günlərində də, istər Ümumdünya Səhiyyə Təşkilatının (ÜST), istərsə də dünya səhiyyə, formokologiyi və biznes mafiyasının nümayəndələri də, bu pandemiya zamanı hətta nə qədər insanın öəcəyini, pandemiyanın nə zaman bitəcəyi barədə də açıqlamalar vermişdilər. Görünür, onlar tam olaraq öz istəklərinə çatmayıblar və bəyan etdikləri nəticələri əldə etmək üçün pandemiyanın davamı üçün yollar axtarırlar. Bill Qeytsin son açıqlamaları da, bu istəkdən qaynaqlanır və gələ biləcək pandemiya üçün əsaslar yaratmağa xidmət edir. Bill Qeyts dünya liderlərinə çağırış edərək bildirir ki; «bu gün əsas vəzifəsi qlobal sağlamlığa təhlükələri tez bir zamanda müəyyən etmək olan beynəlxalq qurumlar yaratmaq lazımdır.» O, dövlət liderlərini həm də sağlamlıq böhranına diqqətlə baxmağa və gələcəkdə belə pandemiyaların qarşısının alınması üçün investisiyaları artırmağa çağırır. Bax, xoruzun quyruğu da, məhz burada görünür. Yəni pandemiya bir çox dünya dövlətlərinin iqtisadiyyatına ciddi zərbə vurduğu bir faktdır, Bill Qeyts də, buna işarə edərək dünya liderlərini baş verə biləcək pandemiyalarla təhdid edərək, onun qarşısını almaq üçün daha çox investisiyalara ehtiyac olduğunu dilə gətirir. Bu da onu deməyə əsas verir ki, COVİD-19 virusu kimlərinsə biznes maraqlarına xidmət edir və onun davam edib-etməyəcəyi də, onların qərarlarından, eləcə də dünya dövlətləri liderlərinin buna münasibətindən asılı olacaq.
Bir məsələni də diqqətinizə çatdırım ki, bundan sonra yarana biləcək pandemiyalar nə qədər güclü və təhlükəli olsalar da insanlar artıq ona hazırdırlar və həmin təhlükəni daha asan dəf edə biləcəklər. Bu pandemiya insanlara lazım olduğu qədər bilgi və təcrübə verdi ki, bu da onlara gələcəkdə özlərini daha təhlükəsiz şəkildə qorumalarına imkan verəcək. Bill Qeyts kimiləri isə "o olmasın, bu olsun"-COVİD-19 virusu olmasın, onun ştammı olsun prinsipi ilə bütün dünyanı öz maraqlarına işləməyə məcbur etməyə çalışır. Heç şübhəsiz ki, burada bir sıra dövlətlərin siyasi maraqları da mühüm rol oynayır.
P.S. Müxtəlif epidemiyalar, pandemiyalar zaman-zaman baş verib, amma onların arasındakı müddət heç də illərlə, aylarla ölçülməyib, buna on illər lazım olub. Çünki hər iki-üç ildən baş verən pandemiyalar mafiyaların gözlədiyi effekti verə bilməz. Buna görə də, tam əmin olun ki, yaxın 50 ildə heç bir pandemiya baş verməyəcək. Müəyyən yerlərdə müxtəlif virus epidemiyalarının baş qaldırması mümkündür, bu isə heç kimi narahat etməməlidir. Olacağa çarə yoxdur. Sadəcə, özünüzü bədliklərdən və bəd əməllərdən qoruyun!
Yusif Seyid