İ.Əliyev İran və Rusiyanın yanlışlarını mətbuata açıqladı

 Tapdıq ABBAS
Baş redaktor,
“Əməkdar mədəniyyət işçisi”,
Pedaqoji fəlsəfə doktoru,
Qarabağ müharibə veteranı
t.abbas1952@list.ru

 Heç kim Azərbaycanın xarici düşmən tərəfindən çarpaz hücuma qaldığını inkar edə bilməz. Bir il əvvəl, 28 il düşmən işğalı altında qalmış torpaqları azad etmək üçün döyüşə atılan qəhrəman ordumuzun vətən müharibəsində qazandığı böyük zəfərdən sonra,  Azərbaycanın xarici düşmən dövlətlərinin hədəfinə çevrildiyini seyr etməkdəyik. Sözdə özlərini ölkəmizə dost, əməldə isə Ermənistana hər cür dəstək verməklə ölkəmizə qarşı açıq düşmənçilikdən çəkinməyən Rusiya və İran başda olmaqla, dünyanın iri dövlətləri Fransa, ABŞ və digər ermənipərəst dövlətlər Azərbaycanın haqq işinə hələ də qara pərdə altından baxaraq, bizə düşmən olan erməni lobbisinin dəstəklədiyi Ermənistana yardım edirlər.

Xarici ermənipərəst türk düşmənlərinin qardaş Türkiyə ilə Azərbaycanın xarici təhdidə qarşı eyni cəbhədə birləşməsi, düşmənləri qorxuya salması çox aydın sezilir. Türkiyə - Azərbaycan prezidentlərinə edilən çoxvektorlu xarici və daxili hücumlar erməniləri çox istəmələrindən deyil, yalnız düşmənlərin TURAN türk dövlətlər birliyinin yaranmasından yana keçirdikləri qorxu və təşvişdəndir.

Ölkə prezidentinin xarici və daxili düşmənlərə qarşı həyata keçirdiyi siyasət olduqca dəqiq hesablanmış hədəflərə yönəlib.

Hazırda Azərbaycanda bütün sahələrdə mövcud olan siyasi, iqtisadi nöqsan, qüsur, hətta cinayətlərin xarici düşmən dövlətlərinin və onların idarə etdiyi daxili düşmən qüvvələrinin fəaliyyətlərinin məhsulu olduğunu hər kəs yaxşı başa düşməli və ölkəmizdə xalqla hakimiyyətin birliyinə xələl gətirən hərəkətlərdən çəkinməlidir.

Bu səbəbdən, ölkəmizin daxilində müstəqilliyimizin və inkişafımızın əleyhinə yönəlmiş, hakimiyyətdə, müxalifətdə və digər alanlarda olan xarici düşmənlərə xidmət edən qara əllərə qarşı ciddi mübarizə aparmalıyıq.

Ölkə hakimiyyətində, müxalifət düşərgəsində, eləcə də mediada və hər bir sahədə Rusiyanın, İranın, ABŞ və Qərbin maraqlarına xidmət edən qüvvələrin azlıq təşkil etmədikləri danılması mümkün olmayan reallıqdır.

Xüsusən, Rusiya və İran dövlətlərinin ölkəmizdə fəaliyyət göstərən agentura şəbəkə üzvlərinin hakimiyyətin bütün qollarında təsir gücünə malik olduğunu hər birimiz yaxşı bilirik, lakin bilgimizə əsasən bu ünsürlərə qarşı ümumxalq mübarizəsi hələ də təşkil olunmayıb.

Xarici düşmənlərlə hazırkı diplomatik mübarizədə, xalqın və dövlətin ən qatı daxili düşməni olan rüşvətxorlara və korrupsionerlərə qarşı gedən döyüşdə də ölkə prezidenti tək döyüşür. Xalqın bu mübarizəyə qoşulmaması, rüşvətxor, korrupsionerlərin onların həyatını zülmə düçar edən faciələrə durub kənardan tamaşa etməsi, ölkə prezidentinin apardığı mübarizənin uğuruna da mənfi təsir göstərir.

Ölkə prezidentinin xarici və daxili mediaya verdiyi müsahibələrdə düşmən dövlətlərin, xüsusən İranın, Rusiyanın, Fransanın və digərlərinin Ermənistanın cinayətlərini himayə etdikləri düşmənçilk hərəkətlərinin üzərinə getməsi, bəzi hallarda hücüm diplomatiyasına üstünlük verməsi olduqca təqdirəlayiqdir.

Hər kəs dərk etməlidir ki, Azərbaycanda xalqın həyatını zülmə düçar edən mövcud problemlərin kökündə xalqın dövlətə inamını sarsıtmaqla məşğul olan, hakimiyyətin qollarına soxuşdurulmuş rüşvətxor və korrupsiya çetesini təşkil edən çoxsaylı xarici düşmən dövlətlərinin xüsusi xidmət orqanlarının agentlərinin fəaliyyətinin nəticəsidir.

Bir sözlə, Xalqın taleyini müəyyən etmək onun öz əlindədir. Xalq onu hakimiyyətin idarə olunmasından kənarlaşdırmış xarici dövlətlərin agentlərini hakimiyyətdən təmizləmək üçün ölkə prezidentinə kömək etmədikcə, ölkədəki ağır durun hökm sürəcəkdir...