İsfəndiyar Vahabzadənin yeni bir skandalla gündəmi dəyişəcəyinə şübhə yoxdur. Bir neçə il öncə həbsdən azad olunan və azadlığa çıxar-çıxmaz “HƏP”çilərə (Haqq Ədalət Partiyası) başçı olacağını bəyan edən Əli İnsanovun quraşdırdığı “partiya təşkilat komitəsi”, yəqin ki, çoxlarının yadındadır. Həmin dövrdə “təşkilat komitəsi”ndə diqqəti cəlb edən şəxslərdən biri mərhum Xalq şairi Bəxtiyar Vahabzadənin oğlu, keçmiş diplomat İsfəndiyar Vahabzadə idi. İlk günlərdə ard-arda verdikləri “açıqlamalar”la guya “sensasion fəaliyyət”lə məşğul olacaqlarını iddia edən “HƏP”çilərin sonradan üstünə su ələnmişdi. Səsi-sorağı çıxmayan “HƏP”çilər elə gəldikləri kimi də getdilər. Səbəbə gəldikdə isə...

Kimin hansı səbəbdən gəldiyi tam məlum olsa da, getmək səbəblərində, yəqin ki, fərqliliklər olub. Məsələn, hətta KİV-də Əli İnsanovun “birinci müavini” kimi təqdim edilən keçmiş diplomat İsfəndiyar Vahabzadə belə “HƏP”dən aralanmasının izahını verib. Etibarlı mənbələrin məlumatına görə, İsfəndiyar Vahabzadə Əli İnsanovdan aralanmasını “mənim atamın bir misrası onun bütün şəxsiyyətindən böyükdür” şəklində açıqlayıb. Demək ki, qısa müddətdə İsfəndiyar Vahabzadə özünə “sədr” seçdiyi adama o qədər bələd olub ki, son qənaəti ilə partiyadan gedişini məhz bu şəkildə ifadə edib.

Amma baş “HƏP”çi İsfəndiyar Vahabzadədən partiyadan gedişini həllə ictimailəşdirməməyi və bir müddət susmağı xahiş edib. Məlumatlı mənbənin sözlərinə görə, sonuncu bununla razılaşıb. Məlumatı təsdiqləmək üçün İ.Vahabzadə ilə əlaqə yaratmaq mümkün olmadı. Mövzunu diqqətdə saxlayacaq və bununla bağlı oxucularımıza məlumat verəcəyik.

P.S. İ.Vahabzadənin bu açıqlaması daha bir sualı ortaya çıxarır: Əcəba, onu atasının bir misrasına belə dəyməyən insanla bir partiya cəlb edən kim və nə olub?

Paralel.az, Pərviz SADAYOĞLU