Əməkdar artistin 60 yaşı tamam olur  

Hər bir xalq adət-ənənəsi, mədəniyyəti ilə başqa xalqlara maraqlıdır. Xalqın mədəniyyətinə qulluq etmək, o xalqın mənəvi həyatında tərəqqinin iştirakçı olmaq deməkdir. Bu baxımdan bədii qiraət ustası, əməkdar artist Azad Şükürovun xidmətləri danılmazdır…

O, 1959-cu ildə Ağdamın Muğanlı kəndində dünyaya gəlib. Hələ orta məktəbdə oxuduğu illərdə bədii özfəaliyyət dərnəyinin fəal üzvlərindən olub. Daha sonra Xətai adına mədəniyyət sarayının nəzdində fəaliyyət göstərən Azərbaycan xalq teatrına üzv yazılıb...

1977-1981-ci illərdə Azərbaycan Dövlət İncəsənət İnstitutunun aktyorluq fakültəsində - Rza Təhmasibin kursunda təhsil alıb. İnstitutu fərqlənmə diplomu ilə bitirdikdən sonra, 1981-1984-cü illərdə Nəcəf bəy Vəzirov adına Lənkəran Dövlət Dram Teatrında çalışıb. 1990-1992-ci illərdə Tədris Teatrında, 1992-2009-cu illərdə Şuşa Dövlət Musiqili Dram Teatrında, 1992-2009-cu illərdə isə Bakı Bələdiyyə Teatrında işləyib…

1990-cı ildən Mədəniyyət və İncəsənət Universitetinin "Səhnə danışığı kafedrası"nda müəllim işləyən qəhrəmanım 6 il həmin kafedranın müdiri olub, indi də dosentidir. Eləcə də bir sıra ədəbi-dram verilişlərində, dublyaj redaksiyasında fəaliyyət göstərir, bədii qiraət ustasıdır…

2003-cü ildə İranda keçirilən I Tehran Beynəlxalq Komediya Festivalında qızıl medala layiq görülüb. 2002-ci ildə Respublikanın Əməkdar Artisti fəxri adına layiq görülüb…

…Bəli, xalqa xidmət edən insanlara diqqət göstərmək gözəl haldır. Fevralın 11-də Azad Şükürovun 60 yaşı tamam olur. Onu uzaq Amerikadan təbrik edir, ona möhkəm can sağlığı arzulayırıq…


Elman Eldaroğlu,
ABŞ, Miçiqan


0.083031177520752