Heç kimin ağlına gəlməzdi ki, Əliyev bunu edəcək

Hollandiya parlamentinin Beynəlxalq Mətbuat Mərkəzində millət vəkili, xalq yazıçısı Elmira Axundovanın Heydər Əliyevin həyat və fəaliyyətinə həsr olunmuş və ingilis dilində nəşr edilmiş üçcildliyinin təqdimat mərasimi keçirilib.

Kult.az xəbər verir ki, tədbir Avropa Azərbaycanlıları Konqresi və Benilüks Azərbaycanlıları Konqresi təşkilatçılığı ilə baş tutub.

Təqdimat mərasimində Hollandiya parlamentinin üzvləri, ictimai xadimlər, “Haaqa”da fəaliyyət göstərən müxtəlif diaspor təşkilatlarının sədrləri, həmçinin Niderland Krallığındakı müvəqqəti işlər vəkili Cəlal Mirzəyev və səfirliyin 1-ci katibi Vüsal Əliyev iştirak ediblər.

Çıxış edənlər Heydər Əliyevin müstəqil Azərbaycan dövlətinin qurulmasında misilsiz rolundan danışaraq qeyd ediblər ki, Elmira Axundovanın ümummilli liderimiz haqqında kitabları Avropada yaşayan və bizim tariximizlə maraqlanan insanlar üçün dəyərli, etibarlı mənbədir.

Millət vəkili Elmira Axundova Heydər Əliyevlə ilk tanışlığından, onun yanında işlədiyi illərdən, çoxcildliyin yaranma tarixindən danışaraq bunları deyib:

“Bu üçcildliyin iki qəhrəmanı var – Heydər Əliyev və Zaman. 1990-1991-ci illər idi. Biz onunla Naxçıvanda darısqal bir otaqda oturmuşduq və o mənə keçmiş həyatından, Qorbaçovla münasibətlərindən, SSRİ-nin dağılmağa məhkumluğundan, respublikamızın isə tezliklə müstəqil olacağından danışırdı.

Heç kəs o vaxt ehtimal edə bilməzdi ki, Azərbaycanın keçmiş lideri, Sovet imperiyasının rəhbərlərindən biri az sonra bütün respublikanı, sonra isə dünyanı təəccübləndirəcək: SSRİ-də ilk dəfə məhz Heydər Əliyev Naxçıvan Muxtar Respublikasında sovet hakimiyyətini ləğv edəcək, ona Azərbaycan Demokratik Respublikasının bayrağını və himnini qaytaracaq.

Bu insanın sirri nədə idi? Niyə bütün ağlagələn və ağlagəlməz vəziyyətlərin əksinə olaraq o, eyni çaya iki dəfə girib, oradan qalib çıxa bilmişdi? Mənə elə gəlir ki, bunun açması böyük ingilis siyasətçisi Uinston Çörçilin sözlərindən ibarətdir. Çörçil bir dəfə demişdi: “Dəyişən vəziyyətə müqabil olmağın yeganə üsulu onunla birlikdə dəyişməkdir”. Heydər Əliyev zamana və vəziyyətə müqabil dəyişə bilir və bunu kifayət qədər orqanik edirdi. Zira, onun üçün əsas amil doğma vətəninin – sevimli Azərbaycanın milli maraqları idi”.

Tədbirin sonunda Azərbaycanın milli şirniyyat nümunələrindən ibarət çay dəsgahı təşkil edilib və müəllif qonaqlar üçün kitab imzalayıb.

 

0.16826295852661