Səhiyyə Nazirliyinin Analitik Ekspertiza Mərkəzi qanunvericiliyə uyğun olaraq əczaçılıq müəssisələrində nəzarət yoxlamaları aparır.

Mərkəzdən verilən məlumata görə, iyun ayı ərzində Bakı şəhəri üzrə 20, respublikanın digər şəhər və rayonlarında isə 3 aptek olmaqla, ümumilikdə, 23 aptekdə - 21 aptekdə planlı, 1 aptekdə plandankənar və 1 aptekdə yoxlamadan kənar təftiş aparılıb.

Aparılan yoxlamalar nəticəsində 3 aptekdə nöqsanlar aşkarlanıb və İnzibati Xətalar Məcəlləsinin 210.1, 452.3 maddələri üzrə protokollar tərtib edilib.

Qeyd edək ki, aptek müəssisəsi barədə hər hansı şikayət və müraciətlə bağlı və ya alınan dərman vasitəsinin keyfiyyəti barədə şübhə yaranarsa, ilkin olaraq apteklərin üzərindəki tanıtma lövhələrində qeyd olunan Səhiyyə Nazirliyinin Analitik Ekspertiza Mərkəzinin 012-596-07-12 nömrəli “qaynar xətt”inə, [email protected] elektron ünvanı və ya www.pharma.az saytının “Müraciət” bölməsi vasitəsilə məlumat verilməsi xahiş olunur.

Ölkədə saxta və qadağan olunmuş dərman satan apteklərin sayı- hesabını müəyyən etmək çətindir. Apteklərdə aşkar edilən nöqsanlar təsdiq edir ki, depolardan apteklərə verilən dərmanlar arasında xeyli satışı qadağan olunmuş dərman pereparatları var.

Görəsən bununla bağlı Səhiyyə Nazirliyinin Analitik Ekspertiza Mərkəzi hansı qabaqlayıcı tədbirlər görüb? Ümumiyyətlə, yoxlama aparılan Səhiyyə Nazirliyinin Analitik Ekspertiza Mərkəzi apteklərdə satışı qadağan olunmuş dərman satan heç olmasa bir aptek müəyyən olunubmu?..

Paralel.az