GƏIMƏDİN
...neçə ildir qaranquş gözümə dəymir

Sən baharın elçisiydin hər zaman
Bu nizamı özü qoyub Yaradan.
Bəs nə üçün tərs gəlibdir bu dövran;
Bitdi , getdi ömrü qışın , gəlmədin.
Harda qaldın qaranquşum, gəlmədin!?

Hər könüldə , gözdə sənin yerin var,
Adına çox nəğmə deyər uşaqlar.
Sənsiz necə kədərlidir bu bahar,
Gündə tökür hey göz yaşın, gəlmədin.
Harda qaldın qaranquşum , gəlmədin ?!

Novruz oldu, göyəribdir səməni
Çiskin , duman gəzir dağı , çəməni..
Həsrət qaldıq , eşitmədik nəğməni..
Səni kimdən, de,soruşum, gəlmədin.
Harda qaldın qaranquşum, gəlmədin.?!

Azalıbdır bu dünyanın səfası,
Gedib keyfi , qalıb ancaq cəfası..
Sınaqdadır sevənlərin vəfası,
Sürür dünya öz savaşın, gəlmədin.
Harda qaldın qaranquşum, gəlmədin.?!

Uşaqlığım əcəb keçdi bəxtəvər,
Cəh- cəhinlə oyanardım hər səhər..
Səni indi məndən sorur nəvələr,
Nə söyləyim , nə danışım , gəlmədin.!
Harda qaldın qaranquşum , gəlmədin?!

Uzaq - uzaq yollar səni yordumu ?
Nakam qaldın , bəxtin üzə durdumu?!
Darıxıram sənsiz görüb yurdumu ..
Sorağına necə düşüm , gəlmədin..
Harda qaldın qaranquşum , gəlmədin.

Novruz gəldi, gəlir daha yaz- dedi,
Amma durna , qaranquşdan az dedi..
Doluxsundum , ürək mənə, yaz- dedi.
Qoy adına nəğmə qoşum, gəlmədin.
Harda qaldın Qaranquşum , gəlmədin !?

Müəllif: Şahlar Hacıyev