Hərbiçilərin ərzaq payını artıran NK qərarı illərdir icra olunmur, amma...

Yeni 2024-cü ilə sayılı günlər qalıb. Hökumət yetkililəri xeyli vaxtdır əhalinin başını gələn ildən pensiyaların, sosial ödəmələrin dolanışıq xərcləri indeksinin dəyişməsinə uyğun olaraq artım faizi ilə qatmaqla məşğuldur. Bu faizin nominal əmək haqqı artımına əsasən 11,2 həcmində olacağı bildirilir. Keçən il isə artım 14,7 faizdən hesablanmışdı. Bəs indeksasiyada kommunal xidmət ödənişlərinin artması nəzərə alınırmı?

Kommunal xidmətlərdə artım olmadığını düşünənlər yanılır. Artıq “ Azəristilik” istilik qiymətlərini mənzilin yaşayış sahəsinə uyğun yox, ümumi sahəyə uyğun hesablayır. Yəni istiliyin qiyməti orta hesabla 1,5-2 dəfə artıb! Bu artımı NK-nın 05.09.2023 tarixli, 303 saylı qərarı ilə bağlayan xidmət qurumu qiymətləri İqtisadiyyat Nazirliyinin Tarif Şurasının müəyyən etdiyini bilərəkdən unudur. NK-nın sözügedən qərarında istilik sayğaclarının binaların girişində quraşdırılan mənzillərin ümumi sahəsinə əsasən Tarif Şurasının müəyyən etdiyi qiymətlərlə hesablanması vurğulanıb. Fikrimizcə, burada anlaşılmazlıq var və bu anlaşılmazlıq istilik xidmətinin əhalinin, istehlakçıların boş cibinə girməsinə gətirib. Birinci anlaşılmazlıq odur ki, qiymətləri Tarif Şurası müəyyən edir, NK yox. Tarif Şurasının qərarında isə mənzilin yaşayış sahəsinin kvadrat metrinə görə 15 qəpik ödənilməsi doğrulanıb. Belə çıxır, hökumət ümumi qiyməti artırmadan ümumi sahəyə uyğun gizli artım tətbiq edir? İkinci anlaşılmazlıq odur ki, axı binaların girişində sayğac quraşdırılmayıb ! Ən başlıcası, mənzillərin ümumi sahəsi deyildikdə binada olan bütün mənzillərin ümumi yaşayış sahəsi anlaşılır yəqin.

Hələ ki istilik qiymətinin NK-nın anlaşılmaz qərarına uyğun 1,5-2 dəfə artırılmasına nə İqtisadiyyat Nazirliyinin Tarif Şurası, nə  Antiinhisar və İstehlak Bazarına Nəzarət Dövlət Xidməti , nə əhalinin sosial müdafiəsinə cavabdehlik daşıyan Əmək və Əhalinin Sosial Müdafiəsi Nazirliyi, nə Ombudsman, nə MM, nə də NK-nın özü reaksiya verir. Yəqin hamısının ürəyincədir. Sabir demiş, mən salim olum, cümlə cahan batsa da batsın!

Yeri gəlmişkən, NK-nın 08.01.2013 tarixli 2 saylı qərarı ilə hərbi və xüsusi rütbəli şəxslərin ərzaq payı norması ikiqat artırılaraq 64 manatdan 128 manata qaldırılıb. Lakin  11 ildir bu artım hərbçilərin təminat xərcliyinə, şəhidlərin , qazilərin, əlillərin pensiyalarına hesablanmır. Sosial hökumət belə olur? Necə olur, əhalinin ziyanına olan bir sözdən yapışıb, anında qiyməti artırırlar, amma konkret artıma uyğun 11 ildir hesablama aparılmır? Bəs indi, istilik qiymətinin gizlin artımı indeksasiya faizinin artımına gətirəcək?

Məğrur Bədəlsoy