BMT Təhlükəsizlik Şurası Şimali Koreya ilə bağlı aydın addım atmalı və ölkənin hərbi kəşfiyyat peykini buraxmaq cəhdlərinin qarşısını almalıdır.

Paralel.az  xəbər verir ki, bunu ABŞ-nin BMT-dəki səfiri Linda Tomas-Qrinfild Təhlükəsizlik Şurasının iclasında deyib.

"Biz KXDR-in qanunsuz davranışını birmənalı şəkildə pisləməliyik. Həmçinin onu Təhlükəsizlik Şurasının bütün müvafiq qətnamələrinə tam və sədaqətlə əməl etməyə çağırmalıyıq", - səfir bildirib.

Bundan əlavə, Tomas-Qrinfild Rusiya və Çinin KXDR-in hərəkətlərini pisləməkdən imtina edərək, beynəlxalq sülh və təhlükəsizliyi dəstəkləmək üzrə öhdəliklərinə əməl etmədiyini vurğulayıb.

Xatırladaq ki, mayın 31-də KXDR “Malliqyonq-1” hərbi casus peykini orbitə çıxarmaq üçün ilk cəhdi edib. Bununla belə, reaktiv daşıyıcı aparat hərəkət qabiliyyətini itirərək Sarı dənizə düşüb.

Avqustun 23-də Şimali Koreya yenidən orbitə peyk çıxarmağa cəhd etsə də, bu da uğursuzluğa düçar olub.