Şərur Rayon Polis İdarəsinin əməkdaşları Naxçıvan Ali Məclisinin sabiq sədri Vasif Talıbovun Aralıq kəndindəki evində axtarış aparıb.

Qaynarinfo xəbər verir ki, bu barədə məlumatı kənd sakinləri "Gündəlik Naxçıvan”a verib.

Axtarışın bu gün baş verdiyi bildirilir:

"Vasif Talıbov istefa verdikdən sonra doğulduğu Aralıq kəndinə köçərək, ailəsi ilə birlikdə həmin evdə yaşayır. Axtarış nəticəsində onun evində xeyli silah aşkarlandığı, evini qoruyan şəxsi mühafizəçilərinin saxlanıldığı bildirilir. Saxlananlardan biri Rövşən Talıbov isə Vasif Talıbovun əmisi nəvəsidir. Saxlanılan digər mühafizəçisi Həsənqulu Novruzov rayonun Siyaqut kəndindəndir”.

Kənd sakini bildirib ki, polislər Talıbovların yaşadığı evə qəfil basqın ediblər:

"Kəndin giriş-çıxışı bir neçə saatlıq bağlandı. Xeyli sayda polis əməkdaşı həyətə basqın etdi. Mühafizəçilərə göz açmağa imkan vermədilər. Vasif müəllim də evdə olub. Polislər evdə silah axtarırıblar. Deyilənə görə, evdən xeyli sayda müxtəlif kalibrli "Vinçestr” silahı çıxıb. Onun mühafizəçilərinin silah gəzdirdiyi bilinirdi. Ancaq evdə də silah olmasından xəbərdar deyildik. Həbs olunan mühafizəçilərin biri Vasif müəllimin əmisi oğlu Abdullanın oğludur. O, həmin evi uzun illərdir ki, mühafizə edirdi. Vasif Talıbov istefa verəndən sonra ailəsi ilə kəndə köçdü, əlavə mühafizəçilər də götürdü. Hazırda evin həyətinə giriş-çıxış da bağlanılıb”.

Məsələyə ilə bağlı Naxçıvan MR DİN Şərur rayon sakinləri Rövşən Talıbov və Həsənqulu Novruzovda qanunsuz silah aşkarlandığını təsdiq etsələr də, əlavə məlumat verilməyib.