Heydər Əliyev adına Müasir Təhsil Kompleksinin növbəti uğuru - VİDEO

 

COVID-19 pandemiyası Azərbaycanda yayılmağa başlayan kimi Təhsil Nazirliyi şagird və tələbələrin təhsildən geri qalmamaları üçün onlayn təhsil sisteminə keçid etdi. Yaranan çətinliklərə baxmayaraq, hər il təşkil olunan intellektual yarışları da ilk dəfə olaraq internet üzərindən keçirilməyə başladı.

Bu yarışlardan biri də Azərbaycan Respublikası Təhsil Nazirliyinin “Təhsildə inkişaf və İnnovasiyalar üzrə III qrant müsabiqəsi” çərçivəsində 6 saylı orta məktəbin təşkilatçılığı ilə keçirilən “Ümummilli lider Heydər Əliyevin xatirəsinə həsr olunmuş məktəblilərarası Fibonaççi intellektual yarışı” oldu. Bu il keçirilən yarışda iştirak edən şagirdlər 40 ümumtəhsil məktəbini təmsil edirdi. Tədris ilinin əvvəlində ənənəvi şəkildə start verilən yarışın final mərhələsi onlayn şəkildə keçirildi. Gərgin mübarizə şəraitində keçirilən yarışın finalında Heydər Əliyev adına Müasir Təhsil Kompleksinin “Growth Mindset” komandası II mövsümün qalibi adını qazandı.

Qeyd edək ki, mütəmadi olaraq təhsillə bağlı yeniliklərə, uğurlara imza atmaqla seçilən Heydər Əliyev adına Müasir Təhsil Kompleksi (MTK) pandemiya dövründə də bu ənənəsinə sadiq qaldı, şagirdlərin intellektual inkişafı üçün bir çox layihələr gerçəkləşdirdi. Bu layihələrdən biri olaraq, şagirdlər arasında keçirilən “MTK Bir Dünya Birlikdə Evdə” adlı onlayn istedad şousunu nümunə göstərmək olar. Azərbaycanda ilk dəfə baş tutan həmin yarış həm şagirdlərin, həm də valideynlərin çox böyük marağına səbəb oldu.

Heydər Əliyev adına Müasir Təhsil Kompleksi tərəfindən həmçinin ilk dəfə onlayn şəkildə məktəblilər arasında “Mind Task” intellektual oyunu da keçirildi. Məhz bu tip yarışlar MTK-da təhsil alan şagirdlərin gələcəkdə iştirak edəcəkləri digər müsabiqə və yarışlarda uğurlu nəticələr əldə etməsində, hər zaman qaliblər sırasında olmasında çox səmərəli, faydalı olacaq. 

Xüsusilə vurğulamalıyıq ki, Heydər Əliyev adına Müasir Təhsil Kompleksi pandemiya dövründə təkcə öz şagirdlərini düşünmədi. Belə ki, ilk dəfə olaraq ölkə üzrə bütün yaş qruplarından olan şagirdlər üçün ödənişsiz onlayn dərslər təşkil olundu. Yüzlərlə şagird bu dərslərdə iştirak edərək, onlayn dərslərdən fayda əldə etdilər. Dərslərin sonunda həm şagirdlər, həm də valideynlər keçirilmiş dərslərdən razı qaldığını bildirərək, onlar üçün yaradılmış şəraitə görə MTK-ya təşəkkür etdilər.

Bir sözlə, Heydər Əliyev adına Müasir Təhsil Kompleksi pandemiya dövründə yaranmış çətin vəziyyətə baxmayaraq, təhsil verməklə yanaşı, şagirdlərin intellektual inkişafı üçün də maksimum imkanlar yaratmağa çalışdı.

Xatırladaq ki, 2020-2021 tədris ilin üçün Heydər Əliyev adına Müasir Təhsil Kompleksinə şagirdlərin qəbulu davam edir. Aşağıdakı linkə daxil olaraq, bu barədə geniş məlumat əldə edə bilərsiniz.

Keçid: https://www.mtk.edu.az/az/

0.38107204437256