Görün YAP-ın namizədinin adı hansı cinayətdə keçir?

"Evimi atan dağıdandan sonra torpağıma sənin həyat yoldaşın, Allahşükür Paşazadənin qızının adına kupça alınmışdı"

27 saylı Sabunçu ikinci seçki dairəsindən namizəd Əliabbas Salahzadəyə Bilgəhdə mülkü yerlə bir edilən Azərbyacan vətəndaşı Seymur Quliyev açıq məktub yazıb. Seymur Quliyev Əliabbas Salahzadəyə atası, eks-deputat Qalib Salahzadənin onun mülkiyyət hüququna qəsdini – Bilgəhdə 2 və 3 mərtəbəli evlərini qanunsuz olaraq dağıtmasını, viranə qoymasını, talamasını xatırladır, özünə və ailəsinə qarşı cinayətə bərəbər qanunsuzluqları haqda məlumat verməklə aradan qaldırılması üçün addımlar atmağa səsləyir. 
Seymur Quliyev 

Criminal.az həmin məktubu təkdim edir:
"Hörmətli Əliabbas! Möhtərəm prezident İlham Əliyev Azərbyacanda yeni bir parlamentin, qanunlara sadiq vətəndaşlardan ibarət bir məclisin formalaşması üçün təşəbbüs göstərib. Vətəndaş olaraq bunu alqışlayıram. Amma sənin namizəd olduğunu eşidəndə prezidentin yürütdüyü siyasətə yerlərdə başdansovdu yanaşmanın sərgiləndiyini düşünürəm.
İşçisi olduğun Sabunçu Rayon İcra Hakimiyyətinin başçısı Adil Vəliyev sizin atanızın mənə qarşı qanunsuzluqlarından xəbərdardır və faktiki olaraq həmin qanunsuzluqları aradan qaldırmaq üçün heç bir tədbir görmür. Adil Vəliyev atanız tərəfindən dağıdılmış, viranə qoyulmuş mülklərim olan torpağa gedən yolun açılması üçün heç nə etmədi.
Baxmayaraq ki, bunun üçün hüquq mühafizə orqanlarının xüsusi göstərişi də vardı. Sizin Adil Vəliyevin işçisi olaraq bu işdə rolunuz haqda bilgisizəm. Amma bu gün Bilgəhdə və ətraf qəsəbələrdə sizə namizəd olaraq adminstrativ üsullarla dəstək verilməsi haqda xəbərlər dolaşır. Sizin parlamentə düşməyiniz üçün çalışırlar. 
Nəzərə alınmır ki, bundan əvvəlki parlamenin bu şəkildə buraxılmasında sizin atanız Qalib Salahzadə kimi deputatların rolu danılmazdır. Məsələn, ötən bələdiyyə seçkilərinin ən qızğın çağında atanız "Onsuz da bilirik ki, kimlər bələdiyyəyə seçiləcək” deməsi ilə siyasi baxımdan səbatsızlığını ortaya qoymuş, ölkə gündəmində zəlzələ yaratmışdı. Nəzərə almırdı ki, bələdiyyə seçkili orqandır, seçkilərin də keçirilməsinə dövlət milyonlarla pul xərcləyir. Belə çıxışlarının sayını bilmirəm, amma mənim başıma gətirdiyi müsibətlərin yanında bu cür fikirlər necə deyərlər "toya getməlidir”.
Təkcə atanızın cibində deputat mandatı ola-ola əlinə daş alıb məni daşa basması parlamentdə kimlərin oturduğunu ortaya qoyurdu. Hörmətli Əliabbas! Atan cibində mandat vətəndaşı daş-qalaq edirdi, sən deputat olsan, bu təkrar olunmayacaq ki? Bunu təsdiqləyən video da var. Maraqlanın, buna əmin olacaqsız. Atanız ölkənin 1 nömrəli salonunda kreslo tutan günlərdən video mətbuatda var. Görəcəksiniz ki, mən müstəqil Azərbaycan vətəndaşı feodolizim dövrünə aid üsulla özəl mülkümdən necə vəhşicəsinə çıxarılmışam! Buna edən isə sizin atanız, o günlərdə deputat olan Qalib Salahzadə olub! 
Hörmətli Əliabbas! Bu gün cənab prezident iradəsini ortaya qoyub və yeni parlamentə seçkilər keçirilir. Ölkə başçısının çıxışlarından da aydın sezilir ki, ortada olan niyyət formalaşacaq parlamentə qanunlara sayğı ilə yanaşan, hər cür cinayətdən kənar, qanunsuzluğu özünə ar bilən, feodal təfəkkürdən uzaq insanların seçilməsidir. Bunları sizə öna görə yazıram ki, mənə qarşı atanızın deputat olduğu müddətdə yol verdiyi qanunsuz, heç bir əxlaqa sığmayan davranışı haqda ətraflı bilgili olasız. Namizədliyinizin irəli sürüldüyünü eşidəndə Bilgəh qəsəbəsində atanızın mənim özəl mülkümə qəsdini xatırladım. Bütün məhkəmə instansiyalarında özəl mülkümün qanunsuz olaraq dağıdılmasını, bu günə qədər atanız tərəfindən mənə özəl torpağıma gedib-gəlməyimə əngəl törətməsi araşdırma predmeti olub. Vəkillərim bu işi gec-tez möhtərəm prezidentimizin yüksək diqqətinə də çatdıracaqlar. 
 Əliabbas Salahzadə 
 
Sizin Elman dayı deyə çağırdığınız, mənim ölkə rəhbərliyinə haqq səsimin çatmasını əngəlləyən digər şəxslərin də cəzası gec-tez veriləcək. Bu işi qanuni tərəfidir.
Hörmərli Əliabbas! Atan deputat olanda mən onun qəbuluna yazıldım. Bəli, mülklərimin varvarcasına dağıdılması, özümün, ailə üzvlərimin, azyaşlı uşaqlarımın paltarlarının, oyuncaqlarının belə talanmasına görə ondan izahat istəyəcəkdim.
Dedilər ki, Qalib Salahzadə heç kimi qəbul eləmir. Ona görə Zeynəb Xanlarovaya müraciət etdim. O da Arif Rəhimzadəyə yönləndirdi. Elə həmin gün mənə qarşı qanunsuzluğun miqyasının düşündüyümdən də geniş olduğunu anladım. Arif Rəhimzadə dedi ki, hər gün qəbuluna respublikanın hər tərəfindən 10-15 nəfər gəlir. Gələn şikayətçilərin də 4-5 nəfəri təkcə atanız Qalib Salahzadədən və onun vaxtilə rəhbəri olmuş Bilgəh Bələdiyyəsindən şikayətçidir.
Hörmətli Əliabbas! Bir məsələni də bilməyini vacib sayıram. Mənim üzərindəki 2 evimi atan dağıdandan sonra torpağıma sənin həyat yoldaşın, bütün Qafqazın şeyxi Allahşükür Paşazadənin qızının adına kupça alınmışdı. İndi namizəd olaraq durumunuzu təsəvvür edin: - bir tərədə atanızdır, hansı ki, mənim mülkiyyət hüququma qəsd edib, 2 mülkümü dağıdıb, yerlə bir edib, digər tərəfdə isə həyat yoldaşınızdır – Xatirə Allahşükür qızı, onun da adına mənim torpağım qanunsuz olaraq rəsmiləşdirilib. 
Siz isə deputatlığa namizədsiz. Belə yaxın qohumları olan biri parlamentdə vətəndaşların hüquqlarından danışa bilər? Ağzınızı açıb danışsanız, atanızın, həyat yoldaşınızın mənim mülkiyyət hüququma qəsddə əsas şəxslər olaraq keçdiklərini sizə xatırladacaqlar. Əminəm ki, tutarlı faktlar qarşısında aciz qalıb susacaqsınız! Mənim kimi Bilgəhdə atanızın qanunsuzluğu ilə üzləşən vətəndaşların sayı itib!
Criminal.az xatırladır ki, Ə.Salahzadə Sabunçu Rayon İcra Hakimiyyətinin İctimai-siyasi və humanitar məsələlər şöbəsinin müdiridir. O, 27 saylı Sabunçu ikinci Seçki Dairəsindən Yeni Azərbaycan Partiyasının (YAP) deputatlığa namizədidir.

Mənbə Criminal.az
1.2660350799561