Gürcü jurnalist: “Keşikçidağ” böhranı Zurabişvilinin məsuliyyətsiz bəyanatlarının nəticəsidir

«Biz bu gün Gürcüstan tərəfindən strateji tərəfdaşımız, müttəfiqimiz və dost ölkə Azərbaycanın “işğalçı” olduğu haqqında tamamilə məsuliyyətsiz bəyanatlar eşidirik. Belə terminlərdən istifadə siyasi məsuliyyətsizlik və cinayətdir. Biz hisslərə qapılmadan hərəkət etməliyik».

Bunu açıqlamasında Gürcüstanın müstəqil jurnalisti Mzevinar Xuçişvili deyib. Onun sözlərinə görə, unutmaq lazım deyil ki, SSRİ-nin dağılmasından sonra müstəqil Gürcüstan və onun qonşuları – postsovet dövlətləri arasında sərhədlərin müəyyənləşdirilməsi üzrə uzunmüddətli və mürəkkəb proses başlayıb. Məhz sovet dövründə müəyyənləşdirilmiş sərhədlər hazırda ciddi problemə çevrilib.

Jurnalist diqqətə çatdırıb ki, “Keşikçidağ” monastır kompleksi ilə bağlı bugünkü böhran isə Gürcüstan Prezidenti Salome Zurabişvilinin məsuliyyətsiz bəyanatlarının nəticəsidir: “Sərhədlərin delimitasiyası üzərində işləməli olduqları halda işləməyən hökumət komissiyasının üzvləri vəziyyəti daha da gərginləşdiriblər”.

M.Xuçişvili hesab edir ki, bu mövzunu süni şəkildə siyasiləşdirməyə dəyməz: “Danışıqlar masası arxasında oturmaq lazımdır. Tbilisi və Bakı arasında yaxşı münasibətlər Gürcüstan üçün çox önəmlidir. Münasibətlərin pisləşməsindən Gürcüstanın özü uduzacaq.

Ümid edirəm ki, bu, aramızdakı mehriban qonşuluq münasibətləri üçün yaxşı sınaq olacaq və bundan sonra bir-birimizin əhəmiyyətini və dəyərini dərk edəcəyik. Vahid Qafqaz bizim xilasımızdır”.

0.097968816757202